Suliaritinneq pillugu naatsumik

Ventiili uummatip silarliata saamiata taqarsuullu tillertup saamiata akornanniippoq, puaallu iltilersorneqareerneranni taakku akornanni aap ingerlaarnissaa ventiilip isumagisarpaa. Ventiili taanna marlunnik immikkoortortaqarpoq.
Uummatip ventiiliani nappaateqalerneq puanut aammik kattuttoqarneranik kinguneqartoq, nerukillisoqarneranik imaluunniit ussiillisimaneranik pissuteqarpoq.

Nerukillisoqarneranut ussiillisimaneranulluunniit pissutaasut

Ventiilimi nerukillisoqarneranut ussiillisimaneranulluunniit pissutaasinnaasut arlaliupput:

• Ventiilikkut aseruuttoorneq.
• Uummatikkut taqqamik milikartoornerup kingunerisaa.
• Ventiilip immikkoortuata aappaani illuttulluuniiit sanngiilliartortoqarnera.

Nerukillisoqarneranut ussiillisimaneranulluunniit ersiutit

Ventiilimi nerukillisoqarneranut ussiillisimaneranulluunniit ersiutit amerlanertigut piffissap ingerlanerani arriitsumik ajorsiartortarput. Uku ersiutaasinnaapput:

• Anernikilliorneq.
• Sakissakkut naqitsineq.
• Qasoqqaneq.

Nappaat ima suussuserneqartarpoq

Ersiutitit misissuinerillu, napparsimmavimmit ilinnik innersuussisumit misissorneqarsimasut misissoqqissaassavagut. Uummatit ultralyd atorlugu misissussavarput aamma napparsimasut ilaat uummataanni taqqat tillertut qinnguartarneqarneratigut misissorneqartarput. Misissuinerit tunngavigalugit uummatip ventiiliatigut suliarineqarnissamik neqeroorfigineqassasutit nalilerparput.

Suliaritinneq

Ventiili suliarinngikkutsigu nutaamik ventiililiissaagut

Uummatip nakorsaata, ilinnik suliarinnittussap ventiili iluarsaanneqarsinnaanersoq, imaluunniit nutaamik ventiiliusamik taarserneqassanersoq nalilissavaa.

Ventiilip iluarsaannera

Uummatip ventiilia ajornanngippat iluarsaanneqassasoq innersuussutigaarput. Uummatip ventiilianik iluarsaanermi ventiilip immikkoortuisa ajoqutai piissavagut, ventiilimullu qajannaallisaasussamik ammalortumik putulimmik ikkussissalluta. Suliaritinnivit kingorna qammatini pingasuni aammut imerpallassaatitussaatit.

Ventiilip taarserneqarnera

Ventiililersittariaqarnermi, ventiliusaliamik uumassusilinneersumilluunniit ventiililersinnissaq toqqarneqarsinnaapput.
Ventiliusaliat qaqugormorsuaq atorneqarsinnaapput. Ventiiliusaliamilli ventiililersissaguit aap ventiilimut nipputeratarsinnaaneranut annikitsumik aalerinartoqarnera pissutigalugu inuunivit sinnera aammut imerpallaassaatitulissaatit.
Uumassusilinneersunit ventiilip attartussusaanut qassinik ukioqarnerit apeqqutaavoq. Ukioqqortuneruguit uummatip ventiilia attartunerussaaq. Uumassusilinneersunit ventililersikkuit qaammatini pingasuinnarni aammut imerpallassaatitussaatit.

Suliaritinneq

Iluarsaallugu taarsiilluniluunniit suliarinninnermi sakissat ammarneqassaaq, taamaalilluni uummat taqarsuarlu takuneqarsinnaalissallutik. Uummammut puannullu maskiina ikkutissavarput. Maskiina uummatip uninnganerani, timimut iltilersuillunilu aammik ingerlaartitsissaaq. Uummatip silarliata saamiatigut ammassavarput, ventiililu iluarsaatinngikkutsigu taarserlugu. Uummat aallarteqqinneqassaaq, uummammullu puannullu maskiina qaminneqarluni.
Sakiak unngerutissiamik matuneqassaaq amerlugu nammineq aattartumik kilulerlugu mersorneqassalluni.
Suliaritereernerup kingorna aalaartarneq nalinginnaasuuvoq. Taamaammat sullulerneqassaatit, sullullip aak sakissamit puumut ingerlaarteriarlugu saleriarlugulu uterteqqittassavaa. Suliarinninnermi akunnerni arlalinni siullerni taamaaliussaagut.

Suliaritinnerup inernera

Suliaritinnikkut ersiutit malunnarunnaartinneqarsinnaapput imaluunniit annikinnerulersinneqarsinnaapput, taamaalillunilu inuunermut naleqarnerulersitsilluni. Amerlasuut suliaritinnerup kingunitsianngua ersiutit annikinnerulersut malugisarpaat. Suliaritinnermit qaammatit arfinillit aqqaneq-marlullu qaangiunneranni suliaritinnerup sunniuteqarnera tamakkiisoq malugisinnaalissallugu naatsorsuutigisinnaavat. Suliaritinninnit qaammat siulleq qasungaatsiartassaatit, tunersukkullu sapaatit akunnerisa arfinillit arfineq-pingasullu akornanni mamikkiartuaartussakkut anniartarsinnaallutit. Suliaritinnerit ilaat inuunertunerulersitsisarput. Suliaritinnerup pitsaasumik inerneqarnissaa anguniarlugu aalasarnissat, pujortartannginnissat ajornanngippallu nerisannik allanngortitsinissat pingaaruteqarpoq.

Napparsimasut amerlasuut suliaritereernerup kingorna annikitsumik nakorsaatitornissaq pisariaqartittarpaat. Napparsimasulli ilaasa nakorsaatit quisaatit imaluunniit uummatip sulilluarunnaarneranut nakorsaatit aammullu imerpallassaat atortariaqartarpaat.

Suliaritinnermi navianartorsiorsinnaaneq

Suliaritinnermi navianartorsiorsinnaaneq inummiit inummut assigiinngitsorujussuupput, taakkuli ass. ukioqqortuuni, puaat sulilluarunnaarsimaneranni imaluunniit uummatip eqittarluni aammik ingerlatsisinnaajunnaarsimanerani annertunerusinnaapput.

• Aalersuineq: Napparsimasut ilaat suliaritinnermut atatillugu aalersortittariaqarsinnaapput, aalluunniit akuinik immikkut aalersorneqartariaqarsinnaallutik.
• Uummatip ingerlaanerata akuttoqatigiikkunnaarnera: Suliaritinnerup nalaani uummatip ingerlaanera akuttoqatigiikkunnaarsinnaavoq, tamannalu nalinginnaasumik nakorsaaserneqarsinnaalluni.
• Uummatip puaallu akornanni immattoorneq: Uummatip puaallu nalaanni aamma immattoortoqarsinnaavoq. Immannera nalinginnaasumik nammineq qaangiuttarpoq, kisiannili piffissami sivikitsumi imaajaasoqartariaqarsinnaasarpoq.
• Aseruuttoorneq: Suliaritinnerup nalaani aseruuttoorsinnaaneq pinaveersaartinniarlugu antibiotikanik nakorsaasiissaagut.
• Taqqamik milikartoorneq: Suliaritittut ilaat nissuni puannilu taqqamik milikartuunnginnissaat pinaveersaartinniarlugu aammut imerpallassaatitortarput. Napparsimasut ataasiakkaat uummatikkut qaratsakkulluunniit milikartoorsinnaapput. Uummatikkut qaratsakkulluunniit milikartoortoqassappat, ajoqutigilikkat amerlanertigut qaangiuteqqittarput.
• Tartut sulilluarunnaarnerat: Suliaritittut ilaasa tartumi sulilluarunnaarallarnerat nalaattarpaat.
• Toqqutigineqarsinnaanera: Suliaritinnermit aniguinngitsooratartoqarsinnaavoq, tamatumali aarlerinarnera annikippoq. Suliaritinnermit aniguinngitsoornissaq uummatip ventiilianik suliaritinnani inuuginnarnissamit annikinneruvoq.

Uku maluginiassavatit

Ventiiliusalersissimaguit ersiutit maluginiarluassavatit

Ventiiliusalersissimaguit taanna timip ilaginngimmagu tassuuna bakteeriaqalernissamut aarlerinartoqalaarpoq. Taamaammat inuunerit tamaat ersiutit makku allamik napparsimassuteqanngikkaluarlutit takkutissappata maluginiagassarissavatit:

• Patsisaanik paasineqanngitsumik piffissami sivisuumi kissarneqarneq.
• Sanigorneq.
• Unnuami anisineq.
• Qasoqqaneq.
• Anernikilliorneq.
• Nukinik naggussanillu anniarneq.

Ersiutit taakku ilaat arlallilluunniit malugigukkit nammineq nakorsannut attaveqassaatit.

Ilisimasaqarnerulerit

Uummatip ventiilianik suliaritinneq pillugu annerusumik uani paasisaqarsinnaavutit www.rigshospitalet.dk/mitralklapoperation.

Aamma uannga annerusumik paasisaqarsinnaavutit www.patienthåndbogen.dk. Una ujassavat ’Mitralklaputæthed (mitralinsufficiens)’.