Suliaritinneq pillugu naatsumik

Uummatip taqaanik milittoornermi nerukillisoorsimanermiluunniit uummatip aalersorneqarnera annikillisarpoq. Qanoq ittumik suliaritinnissamik neqeroorfigineqarnissat taqqat nerukillisimasut amerlassusaat sumiiffiilu apeqqutaassapput. Nerukillisimasutit amerlaneruppata uummatip taqaa milissimasoq avaqqullugu taqalersinnissamik neqeroorfigineqassaatit.

Milinngasoqarneranut nerukillisoqarneranullu pissutaasut

Uummatip taqaasa milinnerannut imaluunnit nerukillinerannut patsisaasut amerlasinnaapput:

• Kingornuttakkat.
• Aap orsoqarpallaarnera.
• Aap naqitsinerata qaffasippallaarnera.
• Pualavallaarneq.
• Pujortartarneq.

Milinngasoqarneranut nerukillisoqarneranullu ersiutit

Uummatip taqai nerukilliartortillugit amerlanerpaat sakissakkut annialertarput, tamannalu ilaatigut uummatip taqaasa milittoornerannik kinguneqarsinnaavoq. Napparsimasut ilaat annikitsumik uummatikkut annialersinnaapput ilaalli anniaratik, ass. sukkornermik napparsimasut aamma allani uummatikkut taqqamik milikartoorneq ersiutaanni siulliusinnaavoq.

Nappaat ima suussuserneqartarpoq

Ersiutitit misissuinerillu, illit nakorsannit napparsimmavimmiillu ilinnik innersuussisumit misissorneqarsimasut misissoqqissaassavagut. Tamatuma kingorna uummatinni taqqat qinnguartarneqarlutik misissorneqassapput. Misissuinerit tunngavigalugit nakorsaatinik, pullartalersinnissamut imaluunniit uummatip taqaa milissimasoq avaqqullugu taqalertinnissamut neqeroorfigineqarsinnaasutit nalilerparput.

Suliaritinneq

Suliaritinneq

Uummat taqarsuarlu takuneqarsinnaalersillugit sakiak ammassavarput, taavalu uummammut puannullu maskiina ikkutissallutigu. Maskiina uummatip uninnganerani, timimut iltilersuillunilu aammik ingerlaartitsissaaq. Sakiammiit, talimiit nissumiilluunniit taqqamik tiguseriarluta taanna uummatimut nuutsissavarput, aak taamaalilluni uummatip taqaa nerukillisimasoq avaqqullugu ingerlaarsinnaassaaq. Uummatip taqaani nerukillisimasut arlaliusimagunik taqqanik arlalinnik atuinissaq pisariaqarsinnaasarpoq. Uummatinnut ledninginik amit aqqutigalugu atassusiissaagut. Suliaritinnerup kingorna tillitit akuttuallaalissappata ledningit uummammut bateerimut atassuserneqarallassapput, taanna timivit avataaniissaaq. Uummat aallarteqqinneqassaaq, aamma uummammut puannullu maskiina qaminneqarluni.
Sakiak unngerutissiamik matuneqassaaq, amerlu nammineq aattartumik kilulerlugu mersorneqassalluni.
Suliaritereernerup kingorna aalaartarneq nalinginnaasuuvoq. Taamaammat sullulerneqassaatit, sullullip aak sakissamit puumut ingerlaarteriarlugu saleriarlugulu uterteqqittassavaa. Suliarinninnermi akunnerni arlalinni siullerni taamaaliussaagut.

Suliaritinnerup inernera

Suliaritinnikkut ersiutit malunnarunnaartinneqarsinnaapput imaluunniit annikinnerulersinneqarsinnaapput, taamaalillunilu inuunermut naleqarnerulersitsilluni. Suliaritinnermit qaammatit pingasut qaangiunneranni suliaritinnerup sunniuteqarnera tamakkiisoq malugisinnaalissallugu naatsorsuutigisinnaavat. Suliaritinninnit qaammat siulleq qasungaatsiartassaatit, tunusukkullu sapaatit akunnerisa arfinillit arfineq-pingasullu akornanni, mamikkiartuaartussakkut anniartarsinnaallutit. Suliaritinnerit ilaat inuunertunerulersitsisarput. Suliaritinnerup pitsaasumik inerneqarnissaa anguniarlugu aalasarnissaq, pujortartannginnissaq ajornanngippallu nerisannik allanngortitsinissaq pingaaruteqarpoq.

Napparsimasut amerlasuut suliaritereernerup kingorna annikitsumik nakorsaatitornissaq pisariaqartittarpaat. Napparsimasulli ilaasa nakorsaatit quisaatit imaluunniit uummatip sulilluarunnaarneranut nakorsaatit atortariaqartarpaat.

Suliaritinnermi navianartorsiorsinnaaneq

Suliaritinnermi navianartorsiorsinnaaneq inummiit inummut assigiinngitsorujussuupput, taakkuli ass. ukioqqortuuni, puaat sulilluarunnaarsimaneranni imaluunniit uummatip eqittarluni aammik ingerlatsisinnaajunnaarsimanerani annertunerusinnaapput.

• Aalersuineq: Napparsimasut ilaat suliaritinnermut atatillugu aalersortittariaqarsinnaapput, aalluunniit akuinik immikkut aalersorneqartariaqarsinnaallutik.
• Uummatip ingerlaanerata akuttoqatigiikkunnaarnera: Suliaritinnerup nalaani uummatip ingerlaanera akuttoqatigiikkunnaarsinnaavoq, tamannalu nalinginnaasumik nakorsaaserneqarsinnaalluni.
• Uummatip puaallu akornanni immattoorneq: Aamma uummatip puaallu nalaanni immattoortoqarsinnaavoq. Immannera nalinginnaasumik nammineq qaangiuttarpoq, kisiannili piffissami sivikitsumi imaajaasoqartariaqarsinnaasarpoq.
• Aseruuttoorneq: Suliaritinnerup nalaani aseruuttoorsinnaaneq pinaveersaartinniarlugu antibiotikanik nakorsaatilissavatsigit.
• Taqqamik milikartoorneq: Suliaritittut ilaat nissuni puannilu taqqamik milikartuunnginnissaat pinaveersaartinniarlugu aammut imerpallassaatitortarput. Napparsimasut ataasiakkaat uummatikkut qaratsakkulluunniit milikartoorsinnaapput. Uummatikkut qaratsakkulluunniit milikartoortoqassappat, ajoqutigilikkat amerlanertigut qaangiuteqqittarput.
• Tartut sulilluarunnaarnerat: Suliaritittut ilaasa tartumi sulilluarunnaarallarnerat nalaattarpaat.
• Toqqutigineqarsinnaanera: Suliaritinnermit aniguinngitsooratartoqarsinnaavoq, tamatumali aarlerinarnera annikippoq. Suliaritinnermit aniguinngitsoornissaq uummatip taqaanik nerukillisimasumik milikarsimasumilluunniit suliaritinnani inuuginnarnissamit annikinneruvoq.

Ilisimasaqarnerulerit

Uummatip taqaa misilissimasoq avaqqullugu taqaliineq pillugu annerusumik uani paasisaqarit www.patienthåndbogen.dk. Una ujassavat ’bypass operation af hjertet’.