Suliaritinneq pillugu naatsumik

Taqarsuarmut tillertumut ventiili taqarsuup tillertup saamiata taqarsuullu akornanniippoq, taannalu taqarsuarmut aammik ingerlaartitsisarpoq. Taqarsuarmut tillertumut ventiilikkut nappaateqalerneq nerukillinermik ussiillinermillu pissuteqartarpoq.  Taqarsuarmi tillertumi ataatsimik arlalinnilluunniit nerukillineqaruni ussiillineqaruniluunniit uummativit nukinga sakkortusiartortumik artorsariartulissaaq, taamaalillunilu silinneruleriartorluni. Suliarinninnerni tamatigungajak ventiiliusamik uumassusilinneersumik imaluunniit ventiliusaliamik ikkussisarpugut.

Taqarsuarmut tillertumut ventiilikkut nappaateqarnermut pissutaasut

Taqarsuarmut tillertumut ventiilimi nerukillisoqarneranut ussiillisimaneranulluunniit pissutaasinnaasut arlaliupput:

• Taqarsuarmi tillertumi taqqat qalippersimanerat, tamanna amerlanertigut utoqqarni takussaasarpoq.
• Taqarsuarmi tillertumi ventiilimi immikkoortunik amigaateqarneq inunnguuserineqarsinnaavoq, taamaalilluni ventiili pingasunik immikkoortoqarani marluinnaasinnaasarlutik.
• Ventiilip matulluarsinnaannginnera, ataasiakkaani tamanna uummatip ventiiliini aseruuttoornerup kingunerisarpaa.

Nerukillisoqarneranut ussiillisimaneranulluunniit ersiutit

Ventiilimi nerukillisoqarneranut ussiillisimaneranulluunniit ersiutit amerlanertigut arriitsumik piffissap ingerlanerani ajorsiartortarput. Uku ersiutaasinnaapput:

• Anernikilliorneq.
• Sakissakkut anniarneq.
• Sivikitsumik ilisimajunnaarnerit.
• Uummatip akuttoqatigiinngitsumik tillernera.
• Uummatip nukiisa issutsinnerat.

Nappaat ima suussuserneqartarpoq

Ersiutitit misissuinerillu, illit nakorsannit napparsimmavimmiillu ilinnik innersuussisumit misissorneqarsimasut misissoqqissaassavagut. Uummatit ultralyd atorlugu misissussavarput aamma napparsimasut ilaat uummataanni taqqat tillertut qinnguartarneqarneratigut misissorneqartarput. Misissuinerit tunngavigalugit uummatip taqarsuani suliarineqarnissamik neqeroorfigineqassasutit nalilerparput.

Ersiuteqanngikkuit suliaritinnissat kinguartinneqarsinnaavoq. Ultralyd atorlugu qaammatit arfinilikkaarlugit imaluunniit aqqaneq-marlukkaarlugit misissortinnissamik neqeroorfigisassavatsigit. Issanngulissaguit, uummatikkut annialissaguit imaluunniit uummatit sulilluarunnaarneranut takussutissaqalerpat suliaritinnissannut piffissanngussaaq.

Suliaritinneq

Ventiiliusamik imaluunniit uumassusilinnit ventiilimik toqqaaneq

Ventiliusamik ikkussinissaq nalinginnaasumik pisariaqartarpoq. Ventiliusaliamik uumassusilinniillu ventiilimik ikkussisoqarsinnaavoq. Ventiliusaliat qaqugormorsuaq atorneqarsinnaapput. Ventiiliusaliamilli ventiililersissaguit aap ventiilimut nipputeratarsinnaaneranut annikitsumik aalerinartoqarnera pissutigalugu inuunivit sinnera aammut imerpallaassaatitulissaatit.
Uumassusilinneersunit ventiilip attartussusaanut qassinik ukioqarnerit apeqqutaavoq. Ukioqqortuneruguit uummatip ventiilia attartunerussaaq. Uumassusilinneersunit ventililersikkuit qaammatini pingasuinnarni aammut imerpallassaatitussaatit.

Suliaritinneq

Uummat taqarsuarlu takuneqarsinnaalersillugit sakiak ammassavarput, taavalu uummammut puannullu maskiina ikkutissallutigu. Maskiina uummatip uninnganerani, timimut iltilersuillunilu aammik ingerlaartitsissaaq. Tamatuma kingorna taqarsuaq ammarneqassaaq ventililu nutaaq ikkunneqarluni. Uummat aallarteqqinneqassaaq, uummammullu puannullu maskiina qaminneqarluni.
Sakiak unngerutissiamik matuneqassaaq amerlugu nammineq aattartumik kilulerlugu mersorneqassalluni.
Suliaritereernerup kingorna aalaartarneq nalinginnaasuuvoq. Taamaammat sullulerneqassaatit, sullullip aak sakissamit puumut ingerlaarteriarlugu saleriarlugulu uterteqqittassavaa. Suliarinninnermi akunnerni arlalinni siullerni taamaaliussaagut.

Suliaritinnerup inernera

Suliaritinneq amerlanerpaani inuunertusaataasarpoq. Suliaritinnikkut ersiutit malunnarunnaartinneqarsinnaapput imaluunniit annikinnerulersinneqarsinnaapput, taamaalillunilu inuunermut naleqarnerulersitsilluni. Amerlasuut suliaritinnermit qaammatit arfinillit kingorna ersiutit annikinnerulingaatsiartut malugisarpaat. Suliaritinnermit qaammatit pingasut qaangiunneranni suliaritinnerup sunniuteqarnera tamakkiisoq malugisinnaalissallugu naatsorsuutigisinnaavat. Suliaritinninnit qaammat siulleq qasungaatsiartassaatit, tunersukkullu sapaatit akunnerisa arfinillit arfineq-pingasullu akornanni mamikkiartuaartussakkut anniartarsinnaallutit. Suliaritinnerup pitsaasumik inerneqarnissaa anguniarlugu aalasarnissat, pujortartannginnissat ajornanngippallu nerisannik allanngortitsinissat pingaaruteqarpoq.

Napparsimasut amerlasuut suliaritereernerup kingorna annikitsumik nakorsaatitornissaq pisariaqartittarpaat. Napparsimasulli ilaasa nakorsaatit quisaatit imaluunniit uummatip sulilluarunnaarneranut nakorsaatit aammullu imerpallassaat atortariaqartarpaat.

Suliaritinnermi navianartorsiorsinnaaneq

Suliaritinnermi navianartorsiorsinnaaneq inummiit inummut assigiinngitsorujussuupput, taakkuli ass. ukioqqortuuni, puaat sulilluarunnaarsimaneranni imaluunniit uummatip eqittarluni aammik ingerlatsisinnaajunnaarsimanerani annertunerusinnaapput.

• Aalersuineq: Napparsimasut ilaat suliaritinnermut atatillugu aalersortittariaqarsinnaapput, aalluunniit akuinik immikkut aalersorneqartariaqarsinnaallutik.
• Uummatip ingerlaanerata akuttoqatigiikkunnaarnera: Suliaritinnerup nalaani uummatip ingerlaanera akuttoqatigiikkunnaarsinnaavoq, tamannalu nalinginnaasumik nakorsaaserneqarsinnaalluni.
• Uummatip puaallu akornanni immattoorneq: Aamma uummatip puaallu nalaanni imertanittoqarsinnaavoq. Immannera nalinginnaasumik nammineq qaangiuttarpoq, kisiannili piffissami sivikitsumi imaajaasoqartariaqarsinnaasarpoq.
• Aseruuttoorneq: Suliaritinnerup nalaani aseruuttoorsinnaaneq pinaveersaartinniarlugu antibiotikanik nakorsaatilissavatsigit.
• Taqqamik milikartoorneq: Suliaritittut ilaat nissuni puannilu taqqamik milikartuunnginnissaat pinaveersaartinniarlugu aammut imerpallassaatitortarput. Napparsimasut ataasiakkaat uummatikkut qaratsakkulluunniit milikartoorsinnaapput. Uummatikkut qaratsakkulluunniit milikartoortoqassappat, ajoqutigilikkat amerlanertigut qaangiuteqqittarput.
• Tartut sulilluarunnaarnerat: Suliaritittut ilaasa tartumi sulilluarunnaarallarnerat nalaattarpaat.
• Toqqutigineqarsinnaanera: Suliaritinnermit aniguinngitsooratartoqarsinnaavoq, tamatumali aarlerinarnera annikippoq. Suliaritinnermit aniguinngitsoornissaq uummatip taqarsuatigut suliaritinnani inuuginnarnissamit annikinneruvoq.

Uku maluginiassavatit

Ventiiliusalersinneqarsimaguit ersiutit maluginiarluassavatit

Ventiiliusalersissimaguit taanna timip ilaginngimmagu tassuuna bakteeriaqalernissamut aarlerinartoqalaarpoq. Taamaammat inuunerit tamaat ersiutit makku allamik napparsimassuteqanngikkaluarlutit takkutissappata maluginiagassarissavatit:

• Patsisaanik paasineqanngitsumik piffissami sivisuumi kissarneqarneq.
• Sanigorneq.
• Unnuami anisineq.
• Qasoqqaneq.
• Anernikilliorneq.
• Nukinik naggussanillu anniarneq.

Ersiutit taaku ilaat arlallilluunniit malugigukkit nammineq nakorsannut attaveqassaatit.

Ilisimasaqarnerulerit

Uummatip taqarsuani tillertukkut suliaritinneq pillugu annerusumik uani paasisaqarsinnaavutit www.rigshospitalet.dk/aortaklapoperation. 

Aamma uannga annerusumik paasisaqarsinnaavutit www.patienthåndbogen.dk. Uani ujaruk ’Aortastenose (uummatip taqarsuani tillertukkut nerukillisoqarnera)’ imaluunniit ’Aortainsufficiens (uummatip taqarsuani tillertukkut ussiillisimaneq)’.