Suliaritinnissaq pillugu naatsumik

Uummatikkut suliaritinnginnermi piareersaatissarpassuupput. Amerlasuut suliaritinnginnerminni susoqassanersoq napparsimmavimmullu unitsinneqarnerup qanoq issanera eqqarsaatigisarpaat. Uummatikkut suliaritinneq annertoorujussuuvoq, aamma aarlerineq nalorninerlu nalinginnaalluinnarput. Qanigisatillu toqqissisimanissarsi isumagilluarneqarnissarsilu uagutsinnut pingaaruteqarpoq. Suliaritinnissaq tamaat pillugu ilaquttatit eqqartueqatigissagitit innersuussutigaarput, qanormi iliusernissat piareersaatissallu amerlapput. Kissaatigigukku qanigisatit oqaloqatigiinnernut nakorsallu takusaanisssaanut peqataanissamut tikilluaqqusaapput.

Piareersarnissaq pingaaruteqartoq

Aseruuttuussaguit, kissarninissaguit ikeqalissaguillu uagutsinnut attaveqassaatit

Suliaritinnissavit tungaanut timinni aseruuttuussaguit, kissarninissaguit imaluunniit ikeqalissaguit imaassinnaavoq suliarisinnaanngikkitsigit. Taamaammat uagutsinnut erngertumik attaveqassaatit, taamaalilluta nutaamik piffissalerneqassanersutit naliliisinnaavugut. Immikkoortortami Attaveqarfissaq Oqarasuaatip normua quppernermi kingullermi ‘Attaveqarfik’ takuuk.

Nakorsaatit uku aammut imerpallarsaatit unitsikkallakkit

Nakorsaatit aammut imerpallassaatit aamma aap akuanut issorsaammut kigaallassaatit taqqatigut milittoornermut pinaveersaartitsissutaallutillu nakorsaataasinnaapput. Nakorsaatilli taakku suliaritinninni aanaangaatsiarnissamut aarlerinartoqarnerulersitsisinnaapput, taamaammat nakorsaatit taakku ilaat suliaritinnginninni unitsikkallassavatit. Nakorsaammik unitsitsigallarnissavit qanoq sivisutiginissaanut, nakorsaatip qanoq ittuunera apeqqutaavoq.

Nakorsaatit ilaannik arlalinnilluunniit atugaqarnerlutit paasiniarlugu, allattorsimaffik ataaniittoq misissoruk. Nalorniguit allattorsimaffik nakorsat peqatigalugu misissoruk.

Nakorsaatit suliaritinnginnerni unitsikkallagassatit:

• Suliaritinnissannut ullut arfineq-marluk sioqqullugit uku unitsikkallassavatit: Efient, Prasugrel
• Ullut arfineq-marluk sioqqullugit uku unitsikkallassavatit:  Naasut isserinit nakorsaasiat tamarmik Naasut isserinit nakorsaasiat suliaritinnermi nakorsaatinut tunniunneqartunut naleqqutinngitsumik sunniuteqarsinnaapput.
• Ullut tallimat sioqqullugit uku unitsikkallassavatit: Clopidogrel, Plavix, Grepid, Cloriocard
• Ullut sisamat sioqqullugit uku unitsikkallassavatit: Pradaxa, Dabigatranetexilat
• Ullut pingasut sioqqullugit uku unitsikkallassavatit: Brilique, Ticagrelor, Marcoumar
• Ullut marluk sioqqullugit uku unitsikkallassavatit: Eliquis, Xarelto, Apixaban, Rivaroxaban, Lixiane, Edoxaban

Uku unitsikkallartariaqanngilatit:

• Magnyl, Hjertemagnyl, Albyl, Hjerdyl, Aspirin, Acetylsalicylsyre, Warfarin imaluunniit Marevan

Nakorsaatit metforminimik akoqartut unitsikkallakkit

Metforminimik akoqartumik nakorsaateqaruit, taanna suliaritinnissannut ullut marluk sioqqullugit unitsikkallassavat. Nakorsaatit uku metforminimik akoqarput: Metformin, Eucreas, Janumet, Jentadueto, Kombolyze, Mitforgen, Segluromat, Synjardy, Velmetia, Vipdomet, Vokanamet, Xigduo.

Nakorsaativit allattorsimaffiat nassaruk

Nakorsaatinik atugaqaruit, nakorsaativit allattorsimaffiat napparsimmavimmut nassassavat.

Timinnik aalatitsigit

Timinnik aalatitsinikkut suliaritinninni kingunerluuteqarsinnaanermik annikillisaaqataasinnaavutit. Ullormut sivikinnerpaamik 30 minutsit ass. pisuttuarlutik sikkilerlutilluunniit timigissartarnissat innersuussutigaarput. Uummalluutivit ajornartinngisaanik aalasarit.

Pujortarunnaarit

Pujortartaruit, pujortarunnaarnissat innersuussutigaarput. Pujortarneq kingunerluuteqarnissamut aarlerinarnerulersitsisarpoq. Pujortarunnarniarnissamut periarfissarpassuit assigiinngitsuupput. Nikotinimut taarsiutaasumik tyggegumminik imaluunniit nipittartunik atugaqarsinnaavutit, imaluunniit pujortarunnaarnissamut pikkorissarnissamut allatsissinnaallutit. Nakorsavit imaluunniit kommunip ikioqqissinnaavaatit.
Uannga ikiortissarsiorsinnaavutit: www.stoplinien.dk
Peqqinnissamut Aqutsisoqarfiup innersuussutai uani nassaarisinnaavatit: www.sst.dk/da/Udgivelser/2020/Stop-med-at-ryge-naar-du-skal-opereres

Imigassartornaveersaarit

Imigassaq uummatikkut puakkullu aseruuttoornissamut ajornartorsiuteqalernissamullu aarlerinarnerulersitsisarmat, suliaritinnissannut sapaatit akunneri sisamat sioqqullugit imigassartunnginnissat innersuussutigaarput. Suliaritinnissannut sapaatit akunnerinik sisamanik sivikinneruppat, sivikitsumik unitsitsigallarneq unitsitsinnginnermiit pitsaanerummat suliaritinnissavit tungaanut imigassartornaveersaassaatit. Tapersersorneqarnissamik ilitsersorneqarnissamilluunniit pisariaqartitsiguit nakorsat, kommuninni imaluunniit napparsimmavimmi aperisinnaavutit.
Uannga aamma ikiortissarsiorsinnaavutit: www.alkohol-raadgivningen.dk
Peqqinnissamut Aqutsisoqarfiup innersuussutai uani nassaarisinnaavatit: www.sst.dk/da/Udgivelser/2020/Alkohol-og-operation

Suliaritinnginninni imerluarlutillu nerilluarit

Timivit suliaritinnginninni pitsaanerpaanissaata pisariaqarnera pissutigalugu nerisaqarluarlutillu imigaqarluassaatit. Nerinissannik kajungerisaqanngikkaluaruilluunniit neriniarsarissaatit. Ajornanngippat annikitsukkaanik, kisianni akulikitsumik proteineqarluartunillu nerisaqarit.

Qanit eqqiluitsuutiguk

Napparsimmavimmi uninngalinnginninni uninnganinnilu qanivit eqqiluitsuutinnissaa pingaaruteqarpoq. Taamaattumik ullormut marloriarlutit kigutigissartassaatit, pissutigalugu tamanna qanerlulernissamut pinaveersaartitseqataasarmat.

Ajornanngippat unngiarit

Angutit suliaritinnginnerminni ungiarnissaat innersuussutigaarput. Umiit qungatsimi ersakkullu mattutiliiniarnitsinnut ajornakusoortitsisarput. Mattutit sullulinnik nerisanillu isaatitsivimmik sullulimmik aalaakkiiniarnermi atorneqartarpagut.

Ajornanngippat kukiusaarutit pinnersaatillu peerneqassapput

Kukiusaaruteqaruit angerlarsimaffinni piissavatit. Amivit kukivillu qalipaativii suliaritinnivit nalaani takusinnaanissaat pisariaqartippavut. Nalunaaqutaq, pinnersaatit timillu ilaatigut pinnersaasersuutit angerlarsimaffimmi peerneqarlutillu qimanneqassapput. Nassatatit nammineq akisussaaffigaatit. Napparsimmavik pigisanut tammartunut tillinneqartunullu tunngaviusumik taarsiineq ajorpoq.

Uku nassassavatit 

Napparsimmavimmut uninnissannut pisariaqarnerpaat kisimik nassassagitit innersuussutigaarput. Taakku pooqattami mikisumiissinnaassapput. Uku nassassavatit:

• unitsinneqarnissannut allagaq
• aggersarneqarninnut atatillugu paasissutissanik immersuiffik tunniunneqartoq (ajornanngippat immersoreerlugu) 
• immaqalu Uumalluttut Peqatigiiffiata Uummat pillugu atuagaa
• eqqiaatit
• isersimmatit
• kamiit, matoqqasut
• makiaarut, errortaq
• qarliit timersuutit, errortat
• nalinginnaasumik nakorsaatitit puuminniittut
• aliikkutassat (tablet, qarasaasiaq angallattagaq, atuagaq, TV-kkut isiginnaarummut tusarnaarutit).

Suliaritinnissannut utaqqininnut siunnersuutitsialaat

Suliaritinnissavit utaqqinerani qanigisatillu eqqarsaaterpassuaqarsinnaavusi. Utaqqinerit eqqarsaatikkut piareersarnermut atoruk. Uku eqqarsaatiginissaa iluaqutaasinnaapput:

1. Apeqqutinik akissutissarsisassanik amigaateqarpunga, taakkulu akineqarsinnaallutik? Taamaappat kimit?
2. Illit qanigisatillu nakorsarneqarnissavit ingerlaneranut, ass. pulaartoqarnissamut, isumassorneqarnissamut, nerisaqarnissamut, piginnaanngorsarnissamut, oqilisaassinissamut immissinnullu qanoq kissaateqarlusilu naatsorsuuteqarpisi? Inuit avatangiisinniittut, akuusussat qanoq iliornissaannik naatsorsuutigisannik erseqqissaaffigivakka?
3. Napparsimmavimmi uninnganerma nalaani sianissusera sunnerneqarpat, imaluunniit puuallassimaassaguma, tamatuma ingerlaneranik ullorsiutit imaluunniit assit atorlugit uppernarsarneqarnissaa ajorissanngilara? Imaluunnit kingornatigut puiorusunneruara? Suut qanigisakkalu pisariaqartippavut?
4. Suliaritereernerup kingorna qasungaatsiassallunga naatsorsuutigisinnaavara. Taama pisoqarnerani suna iluaqutaasinnaava? Suut kinguartissinnaavakka, suullu allanit isumagineqarsinnaappat? Tassunga tunngatillugu qaniginerpaasannut qanoq naatsorsuuteqarninnik erseqqissaavunga? Qanigisama suut pisariaqartissinnaavaat?

Siunnersuutit Uumalluttut Peqatigiiffiata suliarai.
Uani www.hjerteforeningen.dk annerusumik atuagaqarsinnaavutit

Ulloq unitsinneqarfik

Suliaritinnginnermi misissortinnerit oqaloqateqarnerlu

Ulloq taanna unitsinneqaruit aaversissaatit, EKG-mik (elektrokardiogram) misissortissaatit, aamma sakissakkut tarrarsortillutik assilisissaatit. Angissutsit, oqimaassutsit aavillu ilteqassusaa uuttortassavagut. Suliaritinnissap ingerlanissaa, sinitsinneqarneq suliartinnerlu pillugit oqaluttuutissavatsigit.
Nakorsap, suliarinnittussap suliaritinnermi mianernartuusinnaasut kingunerluutaasinnaasullu pillugit oqaluttuutissavaatit, suliaritereernermilu qanoq pitsaanerulersinnaanerit pillugu nassuiaatissallutit.

Tallimanngornermi unitsinneqaruit ataasinngornermi aatsaat suliaritissaatit, taamammat misissortereeruit oqaloqatiginnereeruillu angerlaqqissinnaavutit. Sapaammi unnukkut suliaritinnissamut aqaguinnanngortoq takkuteqqissaatit.
Misissortinnissannut oqaloqatiginninnissanullu qanigisannik ilagisaqarnissannut tikilluaqqusaavutit. Marluullusi tusarnaarlusilu apeqquteqarsinnaagussi iluaqutaassaaq.
Piareersarnerit assigiinngitsut akornanni utaqqisoqangaatsiarsinnaavoq.

Unitsinneqarnivit nalaani nakorsaatit

Uninnganivit nalaani nakorsaatinik pissarsinissat isumagissavarput.

Napparsimmavimmi atisanik tunineqassaatit

Suliaritinninni atugassannik, napparsimmavimmi atisanik tunineqassaatit.

Meqquiarneqassaatit

Sakissanniit imeqqutannut illuttut immaqa meqquiarneqassaatit. Meqquiarninni ikiussavatsigit, aminni taamaalilluni aseruuttoornissamut aarlerinarnerulersitsisumik kimillanneqassanani. Suliaritinnissavit tungaanut ulluni 14-ini nammineq meqquiassanngilatit.

Uffassaatit

Suliaritinnissat aqaguppat unnukkut qaqorsaammik timimi tappiorannartuiaatitalimmik qaqorsaaserlutit uffassaatit.
Uffareeruit kiinnamut taniutit, kukinut taniutit, unernut tarnut imaluunniit tipigissaat aseruuttoornissamut aarlerinarnerulersitsisinnaammata atussanngilatit.

Nerilluarit

Sutoqqusaajunnaannginninni nerilluarlutillu naammattumik imerluassaatit.

Suliaritinnginninni sutornaveersaassaatit

Suliaritinninni puallulernermik kinguneqartitsisinnaasunik nerisat akuinik puannukartoqarnissaa pinaveersaarniarlugu, aqajaqqut imaqassanngilaq. Taamaammat suliaritinnissat sioqqullugu unnuap-qeqqanit sutornaveersaalissaatit. Tassa imaappoq nerisassanik immunnillu nerisassianik nereqqusaanngitsutit. Imermilli ullaakkut arfernup tungaanut imersinnaavutit.

Sinissaammik pisinnaavutit

Sinissaaleqiguit sininnialeruit sinissaammik pisinnaavutit.
 

Ullormi suliaritiffissami

Itersassavatsigit suliaritinnissannullu piareersarlutit

Suliaritinnissannut piareersarnissat pissutigalugu ullaaralaakkut itersarneqassaatit Imaaliussaatit:

• aappit naqitsinera tillernerillu uuttortarneqarlutillu kissarnersiorneqassaatit
• amermi tappiorannartuiaatitalimmik qaqorsaaserlutit uffassaatit
• kigutigissaatitit, kigutit qaqorsaataat illaagutillu puussiamut plastikkimut tunniunneqartumut ikissavatit
• immiartorfiit marluk ullaakkut nal. 06.00 nallertinnaguimissavatit, tamatumalu kingorna kigutigissassaatit
• oqimaalutassaatit
• ullaakkut iisartakkatit iissavatit.

Piareeruit sineqqilaarsinnaavutit. Pilattaavimmukartinnak, pigisatit ataatsimut poortoriarlugit sikaavimmut tunniunneqarsimasumut ilissavatit. Issarussat, kigutaasat iluaqusersuutaasinnaasullu allat pilattaavimmukarnissavit tungaanut atuinnarsinnaavatit. Taakku peruluttut inaannukaanneqarnissannut nassartinneqarnissaat isumagissavarput.

Qanigisatit ullaakkut najorsinnaavaatsit pilattaavimmullu ingiallorsinnaallutit. Ineqatigisavillu eqqissisimaarnissamik pisariaqartitsisinnaanera eqqarsaatigineqassaaq.

Pilattaavimmi

Taratsersuuserneqassaatit aamma elektrodimik uuttortaammillu atortulerneqassaatit

Talikkut taratsersuuserneqassaatit, taamaalilluta nakorsaammik imerpalasumillu tuniorarsinnaassallutit. Taqqannut sullulimmik, aappit naqitsineranik uuttuisussamik aamma ikkussissaagut. Uummativit ingerlaarneranik aamma aap naqitsineranik nakkutilliinissamut elektrodilerneqassaatit, inussannilu aap ilteqassusaannik uuttuutilerneqassallutit.

Ilisimajunnaartinneqassaatit

Ilisimajunnaarsinneqarlutik suliaritissaatit, taamaalillutik sinissaatit malugisaqassanallu. Ilisimajunnaarsinneqareeruit qungasivit saneraatigut taqqakkut sullulerneqassaatit. Naggataatigut sakissat, nissut immaqalu talitit aminnut sungaartitsisumik tunillannartuiassavarput.

Suliaritinneq

Ilisimajunnaartinneqareeruit nakorsap sakissat ammassavaa, uummatit taamaalilluni takuneqarsinnaalissalluni.  Uummammut puannullu maskiina ikkutissavarput. Maskiina nakorsap uummatinnik suliaqarnerata nalaani, uummatip uninnganerani timimut iltilersuillunilu aammik ingerlaartitsissaaq. Uummatinnut ledningilinik amit aqqutigalugu atassusiissaagut. Suliaritinnerup kingorna tillitit akuttuallaalissappata ledningit uummammut bateerimut atassuserneqarallassapput, taanna timivit avataaniissaaq. Suliaritereernerup kingorna aalaartarneq nalinginnaasuuvoq. Taamaammat sullulerneqassaatit, sullullip aak sakissamit puumut ingerlaartissavaa tassangalu sanilinneqarsinnaallunilu uterteqqinneqassaaq. Pisariaqartinneqarpat suliaritinnissannut akunnerit arlallit sioqqullugit taamaliorsinnaavugut.

Uummat aallarteqqissavarput, uummammullu puannullu maskiina qamillugu. Sakiak unngerutissiamik matuneqassaaq amerlugu nammineq aattartumik kilulerlugu mersorneqassalluni.

Suliaritinnerup qanoq annertutiginera apeqqutaalluni suliarinninneq sivisussusilerneqassaaq. Suliaritinneq nalinginnaasumik akunnerit sisamat arfinillillu akornanni sivisussuseqartarpoq.

Peruluttut uninngavianni

Suliaritinnerup kingorna iteriartorneq

Suliaritinnerit naammassippat, peruluttut uninngaviannukaatissavatsigit, tassani silaarutsinneqarninnit iteriartussaatit ullorlu siulleq tassani unnuissallutit. Tassani soorlu uummatip ingerlaarneranik aamma aap naqitsineranik uuttortaasunik atortorissaarusersorneqassaatit.

Suliaritereernerup kingorna anersaartornissamut ikiorneqarnissat pisariaqartissavat

Suliaritinnerup nalaani kingornalu torlut aqqutigalugu sullulimmik anersaartuuteqassaatit. Anersaartuutip ajornaannerusumik anersaartorsinnaanissamut ikiussavaatit. Anersaartuuteqarninni quersorlutit nuammik anisitsiniarnerit ajornakusuussaaq. Taamaammat milluaanissarput pisariaqarsinnaavoq. Tamanna quersortitsisarmat ippinnarsinnaavoq.

Anersaartuuteqarninni oqalussinnaanngilatit. Sikisarnikkut ileqimisaarnikkulluunniit attaveqateqarsinnaavutit, aamma pappiaraq aqerluusarlu iluaqutsiunneqarsinnaapput. Sinititsissummit sunnerneerukkuit namminerlu anersaartorsinnaanngoruit anersaartuut piissavarput. Anersaartuutip peernerata kingorna toqqusaatit annernalaarsinnaapput aamma iggiarlussinnaavutit. Tamatuma kingorna qinngakkut saniatigut iltilersorneqassaatit.

Sinitsitsissut merianngutitsisinnaavoq

Suliaritereernerup kingorna sinitsitsissut pissutigalugu merianngusinnaallutillu meriarsinnaavutit. Meriannguninnut tunngatillugu pisariaqartitsiguit nakorsaammik tunisinnaavatsigit.

Imerusussaatit

Anersaartuut peerneqareerpat imerusungaatsiarsinnaavutit. Qanivit masatsernissaa pisariaqartikkukku oqarfigissavatsigut. Suliaritereernermi ulloq siulleq qanorluuniit imertigigaluarluni imerusungaatsiarneq nalinginnaasuuvoq. Naammattumik pisariaqartumik imigaqarnissannut ikiussavatsigit. Imerpallaaruit sinitsitsissut pissutigalugu meriarsinnaavutit.

Nerisassanik neqeroorfigineqassaatit

Nerisinnaanngorniariartutit nerisassanik neqeroorfigissavatsigit. Ulloq siulleq nererusussuseqarpallaannginnissaq nalinginnaasuuvoq, proteinimilli imigassamik neqeroorfigissavatsigit. Aqaguani ullaakkut ullaakkorsiutillerfigineqassaatit.

Anniaruit oqassaatit

Anniarnissaq ilimagissavat, aamma anniaatigineqartoq tamaat peersinnaajuaannanngilarput. Annernarnera 0-imiit 10-mut qanoq annernartiginera apeqqutigissavarput. Annernarnerata qanoq innera inummiit inummut assigiinneq ajorpoq, sapinngisatsinnillu annikillisassavarput.

Inginnissannut imaluunniit nikuinnissannut ikiussavatsigit

Naak qasugaluarlutik nukissaaleqigaluarlutilluunniit naallu sulluusanik ledninginillu atortulersoqqagaluarlutit mianersortumik aalaneq ilinnut iluaqutaassaaq. Suliaritinnerup ulluani tassani siniffiup killinganut inginnissannut imaluunniit nikuinnissannut ikiussavatsigit. Immaqa unnuup ingerlanerani torsuusami pisuttualaarsinnaaleriissaatit. Aqaguani issiavimmut immaqa ingissinnaalissaatit. Siniffimmiit massinninni siullerni arlaleriarlutit uissanngulernissat nalinginnaasuuvoq.

Sullullip quussap kuuffiata peernissaa

Sinitsinneqarnivit nalaani sullulimmik quiffilerneqassaatit, quussat taamaalilluni puussiamut kuussinnaassalluni. Sullulik quussap kuuffia nalinginnaasumik suliaritinnermit ullut marluk qaangiunneranni peertarparput.

Sininnerit akornuserneqarsinnaavoq

Naak suliaritinnivit kingorna ajunngikkaluarlutillu sinikkusukkaluartutit, akuttunngitsumik takuniartariaqarpatsigit. Suliaritereernerup kinguninnguani, ulloq siulleq qanimut nakkutiginissat pisariaqarpoq. Unnuami akornusersuutaasinnaasoq nalunngilarput, taamaammat annikinnerpaatinniarsarissavarput.
Peruluttut uninngavianni atortorissaarutinut arlalinnut uummativit ingerlaarneranik tillerneranillu uuttuisunut atassuserneqassaatit. Atortorissaarutit ilaat isiginnaarummut, qaamaneqartumut nipeqartumullu atassuteqarput. Taakku qaqutiguinnaq navianaateqarsinnaasumik sulisunulli maluginiaaqqusisunik nipiliungaatsiartuupput.
Sininniarnermi isinut assiaqut aamma siutinut sinissat peruluttut uninngavianniinninni sininniarninnut iluaqutaasinnaapput. Kissaatigigukku siutinut sinissanik tunisinnaavatsigit.
Sinitsinneqaqqammeravit sininnartumik tunisinnaanngilatsigit. Eqqissisimaarnissat pisariaqartikkukku, akisimik nipilersorsinnaasumik tunniussaqarsinnaavugut.

Sivikitsumik takorruuisinnaavutit

Suliaritittut ilaat puullaaqilaarsinnaasarput, imaluunniit piviusuunngitsunik takusuusisarsinnaallutik. Tamanna takorruuinermik taaneqartarpoq, suliariterujussuarnerullu kingorna nalinginnaasuulluni. Misigisatit oqaasertalersinnaagukkit, uagutsinnut oqaluttuarissagitit innersuussutigaarput, taamaalilluta pitsaanerpaamik ikiorsinnaassavatsigit.

Qanigisanit pulaarneqarneq

Qanigisannit sivikitsumik pulaarneqarsinnaavutit. Pulaartut peruluttut uninngavianni saaffiginnittarfimmut saaffiginnissapput, aamma pulaareernikuusimagaluarunik. Pulaartuvit illit inimilu napparsimasut allat eqqarsaatigissavaat. Amerlasuut suliaritinnerup kingorna qasungaatsiartarput, sivisuumillu pulaartoqarnissaminnut nukissaqartaratik.
Qanigisatit Rigshospitalip nuutsitsisarfianut sianerlutik peruluttut uninngaviannut, uninngavigisannut nuutsitsisinnaapput. Qanigisavit pulaartoqarusunnersutit qaqugulu tamanna pitsaanerunersoq immikkoortortamut apeqqutigisinnaavaat. Qanigisaasut ulloq unnuarlu sianernissaminnut tikilluaqqusaapput. Qanigisaq ataaseq aalajangersimasumik attaveqaataassasoq innersuussutigaarput. Attaveqarfissamut paasissutissat quppernermi kingullermi ‘Attaveqarfissaq’-p ataani takukkit.
Saaffiginnittarfik unnukkut unnuamilu inoqarneq ajorpoq, pulaartussatit taamaammat matumik ammaatsinniarunik matup siarngatigut sianissapput.

Eqqiluisaarnissaq eqqarsaatigalugu peruluttut uninngavianni naasoqaqqusaanngilaq. Taamaammat pulaartut immikkoortortamut uteqqinnissat utaqqeqqaarlugu naasunik aatsaat pajunnissaat isumassarsiatsialaavoq.

Immikkoortortamut uteqqinnissannut piareersarneqassaatit.

Suliaritereernivit kingorna asattornissannut ikiussavatsigit, issiavimmut ingissaatit, tassanilu ullaakkorsiorsinnaallutit. Ledningit arlallit aamma aap kuuffissaa ajornanngippat piissavagut. Tamatuma kingorna immikoortortamut nooqqissaatit.

Immikkoortortami

Qanoq innerit ullut tamaasa nakkutigissavarput

Immikkoortortamut uteqqikkuit uummativit ingerlaarnera, tillernerit, kissarnerit aavillu naqitsinera uuttortaannassavagut. Timivit isserata pissusissamisoornera, anersaartornerillu aamma nakkutissavagut aallu misissorlugu.
Ulluni siullerni uagutsitsinni ikorfartorneqarnissat ikiorneqarnissallu pisariaqartissinnaavat, ullulli ingerlaneranni amerlanerni nammineersinnaalissaatit, ass. perusuersartarfiliarneq, uffarneq, torsuusarsuarmi sungiusarneq namminerlu siniffimmiit massinneq.

Nakorsat takusaanerat

Nakorsat nalinginnaasumik nalunaaqutaq 08.00-09.00-llu akornanni takusaasarput, aamma, imaluunniit pisariaqarpat ullup ingerlanerani. Malittarineqarnerit ajunngitsumik ingerlappat nakorsamit ullut tamaasa alakkarneqarnissat pisariaqanngilaq. Peqqissaasulli ullut tamaasa alakkartassavaatsit. Nakorsamik oqaloqateqarnissaq kissaatigigukku, qanigisavilluunniit kissaatigiguniuk, tamanna peqqissaasumut aaqqissuuteqqussavarsi.

Aalalluarit

Timimik atuineq iluarusunnerulernermik kinguneqartarpoq, taqqakkullu milittoorsinnaaneq annikinnerulertarpoq, aamma puaat, aqajaq inalukkallu sulilluarnerulersarput. Taamaammat ullup ingerlanerani aalallutillu sapinngikkaangakku issiavimmi issiasassaatit. Tuavisaaritsigit misigisimasinnaavutit, kisianni aalaneq suliaritereernerup kingorna timikkut tarnikkullu sukkanerusumik qaangiisitsiartortartoq ilisimatusarnerup takutinnikuummagu taamaaliorpugut.
Ullup ingerlanerani siniffimmi nalavallaaruit, tamanna unnuami sinittarnernut sunniuteqarsinnaavoq. Sapinngisannik aatsaat sininnialeraangavit imaluunniit qasuersernialeraangavit siniffimmiittarit. Ajornanngippat ulloqeqqasioreernerup kingorna sinilaartarit.

Aalaniarnerit ajornakusoortikkukku imaluunniit sinnarlukkuit oqaloqatigisigut.

Timimik atuinissamut pilersaarut

Ulloq suliaritiffik:

• Unnuup ingerlanerani siniffiup killingani issianissannut ikiorneqassaatit, natermut aqqarniartussaassaatit imaluunniit inimi pisulaassallutit.

Suliaritinnerup kingorna ulloq siulleq:

• Ulloqeqqata-tungaa: Siniffiup killinganut inginnissannut aamma nikuinnissannut ikiorneqassaatit.
• Ulloqeqqata-kingorna: Inimi aamma ajornanngippat torsuusarsuarmi pisuttuarnissannut ikiorneqassaatit. Issiavimmut ingissaatit.
• Unnukkut: Inimi aamma torsuusarsuarmi pisuttuarnissannut ikiorneqassaatit.

Suliaritinnerup kingorna ullup aappassaani:

• Ulloqeqqata-tungaa: Pisariaqartitsinerit naapertorlugu ikiorneqarlutit nammineq eqqiluisaassaatit torsuusarsuarmilu pisuttuarlutit.
• Ulloqeqqata-kingorna: Torsuusarsuarmi pisuttuassaatit aamma issiavimmi issiassaatit.
• Unnukkut: Torsuusarsuarmi pisuttuassaatit aamma issiavimmi issiassaatit.

Suliaritinnerup kingorna ullut pingajussaanit tallimassaanut:

• Pisariaqartitsinerit naapertorlugu ikiorneqarlutit nammineq eqqiluisaassaatit  torsuusarsuarmilu arlaleriarlutit pisuttuarlutit.
• Issiavimmi sivisunerusumik issiassaatit.
• Nerisassanik nammineq tigooragasanik sassaalliivimmut neriartorsinnaavutit.

Suliaritinnerup kingorna ullut tallimassaanit arfineq-aappassaanut:

• Torsuusarsuarmi arlaleriarlutit pisuttuartassaatit, piffissarlu annerusoq makitasassaatit, ullullu ingerlanerani arlaleriarlutit eqqissisimaarfeqartassallutit.
• Sikkili timigissaat torsuusarsuarmiittoq atorsinnaavat, timimillu sungiusaasuni sungiusaqatigiinnut ilaasarlutit.
• Majuartarfitsigoorusukkuit oqaloqatigisigut.

Alersinik sukangasunik atugaqarsinnaavutit

Niunnit taqqamik peersisoqarsimappat imaluunniit nissunni imertanissimaguit sukangasumik alersilerneqassaatit. Qanoq atissanerit piissanerillu takutissavarput. Alersip sukangasuup nissuni pullattoornissaq taqqamillu milittoornissaq pinaveersaartittarpaa.
Angerlartinnak alerseq sukangasooq qanoq sivisutigisumik atussanerit naliliiffigissavarput.  Unnukkut peertassavat, ullaakkullu makikkaangavit ateqqittassallugu.
Pisariaqartikkukku apotekimi alersimik sukangasuumik saniatigut atugassannik pisisinnaavutit.

Ikivit nalaa, tunukkut tuitillu annernalaarsinnaapput

Suliaritinnerup kingorna sakissakkut ikikkullu anniarsinnaavutit. Aamma tunut tuitillu annernalaarsinnaapput. Anniarnaveersaatinik tunisaannassavatsigit anniarisat inummiit inummut assigiinngitsuusarput, sukkut qanorlu annernarnera oqaluttuarissavat. Annernarnera annernarpallaalersinnagu oqaatigissavat.

Imerluassaatit

Suliaritinnerup kingorna imeq timimi katersuuttarpoq, taamaammat querusunnartunik iisartakkerneqarnissat pisariaqarsinnaavoq. Tamatuma saniatigut immaqa querusunnartumik iisartakkerneqareeraluartutit naammalluartumik imernissannik qinnuigissavatsigit. Aap taqqani ingerlaarluarnissaa tartuillu salilluarnissaat tamatumani siunertaavoq. Taamaammat sulisunit innersuussutaasutut annertutigisoq imertariaqarpat.

Illigisaarussinnaavutit

Illigisaqanngikkuit, imaluunniit nerisavit mamassusaat allaappat oqaluttuutissavatsigut. Suliaritittut ilaat suliaritereernerup kingorna merianngullutillu mamassutsimik malugisinnaassusaat allanngortarpoq. Meriannguninnut nakorsaasersinnaavatsigit.

Qarngit qasilippat imaluunniit ikuallattutut ippat oqassaatit

Qanit qasilikkuni ikuallattuusiguniluuniit oqaluttuutissavatsigut, tamanna qanerlunnermut ersiutaasinnaavoq. Qanerlulissaguit tamanna nakorsaasissavarput.

Nakorsaat manngertitsissutaasinnaavoq

Nipaallisaatit ilaat manngertitsilertitsisinnaapput. Sapinngisamik aalalluarnikkut imerluarnikkullu aqajaqqut ingerlaarluartissinnaavat. Aamma manngertitsinernut iluaqutaasumik nakorsaammik, imaluunniit paarmarsuarmik juiceliamik pisinnaavutit.

Ullut unnuallu marluk qaangiunneranni kuutsitsivigalutit uffarsinnaavutit

Ullut unnuallu marluk qaangiunneranni, ikit mamippat peqqissaasumit ikiorneqarlutit qorlortitsivigalutit uffarsinnaavutit. 

Eqqiluisaarluarnissaq isumagiuk

Aseruuttoornissaq pinngitsoortinniarlugu eqqiluisaarluarnissaq pingaaruteqarpoq. Tassa assatit perusuersartarfimmeereeraangavit asalluartassavatit nerisassanillu aallertinnak assatit sprittertassallugit. Inini uninngavinni tamani spritteqarpoq.

Angerlarnissat pillugu oqaluutissavatsigit

Amerlanerit ulluni sisamanit arfineq-pingasunut napparsimmavimmi uninngasarput, tamannali inummiit inummut assigiinneq ajorpoq. Angerlarnissannut piareersimanngikkuit najukkanni napparsimmavimmut unitsinneqassaatit. Qanoq innerit aatsaat aalaakkaalerpat angerlassaatit.
Angerlaqqereeruit qanoq innissat, nakorsaatit ulluinnaallu qanoq innissaat pillugit oqaloqatigissavatsigit, taamaalilluta kommunimut attaveqarluta qanoq ikiorneqarnissannik pisariaqartitsinerit pilersaarusiorsinnaavarput.
Oqaloqatigiinnissamut uunga qanigisannik ilagisaqarnissat innersuussutigaarput. Angerlartinneqarnissannut tunngatillugu illit nammineq qanigisatilluunniit apeqqutissaqarussi imaluunniit ernumassutigisaqarussi, tamanna pillugu oqaloqatigisinnaavassi.

Ilisimasaqarnerulerit

Suliaritinnissap ullussaanut piareersaatit aamma sinitsinneqarnissamut piareersaatit pillugit filmiliaq isiginnaaruk. Suliaritinneq pillugu isiginnaagassiaq paasissutissiinertalik uani nassaarisinnaavat: www.rigshospitalet.dk/hjerteoperation