Niaqqukkut/toqqusaakkut qinnguartartilluni nakorsartinnerup nalaani tamatumalu kingorna sungiusarnermi najoqqutassat

Aallaqaasiut

Qinnguartartilluni nakorsartinnerup nalaani tamatumalu kingorna kingunerinik ullut tamaasa sungiusartarnerup annikillisitseqataasarnera, misilittakkat takutippaat.

Timimik atuinerup qasoqqanermik annikillisitsisinnaanera isumagisaalersitsisarneralu pingaaruteqarputtaaq. Taamaalillutit nukissaqarnerulissaatit.

Ullut tamaasa sungiusarnissat pingaaruteqarpoq (assit takukkit).

Sungiusaatit suut ingerlatissavakka?

Sungiusaatit assini takusinnaasatit naapertorlugit aalasinnaaneri ajornakusoortutut malugisinnaasatut toqqakkatit, ullut tamaasa akulikitsunik sungiusartakkit.

Aalasinnaanerup ajunnginnera qulakkeerniarlugu sungiusaatit allat akornatigut ingerlattakkit.

Angerlareeruit sungiusartuarit.Tunusuit, qanerpit oqqavillu aalatissinnaanerat
nakkutigiuk.

Siunnersuutitsialaat

Qaasoqqaneq nappaativillu nakorsarneqarnerani kingunerluutit annikillisinniarlugit illit nammineq qanoq iliuuseqarsinnaavutit:

• Ullut tamaasa pisuttuartarit
• Anertikkalaartarsinnaavutit
• Proteineqarluartunik nerisarit. Protein nukiit annertusaqqinnissaannut iluaqutaavoq. Taakku tassaasinnaapput kakao, imigassaq proteinimik akoqarluartoq imal. arferup neqaa
• Imerluartarit.

Peqqissaasumit nakorsamilluunniit tunusuit tuivillu aalatinniarnerannut, qanerpit ammarnissaanut, oqqavit aalatinnissaanut, iisisinnaaninnut, kiinnakkut misigissutsinnik ersersitsisinnaanerpit annikillineranut, kiinnavit/qungatsivit pullannerannut ajornartorsiuteqarninni sumut ikiortissarsiorsinnaaninnik oqaatiginnissinnaasumit ilitsersortigit.

Kiinnap nukingisa sungiusarnissaannut najoqqutassaq

• Tarrarsuut saallugu ingigit nikuigilluunniit
• Sungiusarneq kigaatsumik ingerlanneqassaaq annialersitsissananilu
• Sungiusaatit immikkut tamaasa tallimariakkit, sekundini tallimani sukasimatitsigit, sungiusaatit ullormut arlaleriartakkit

1. Alleqqut illuaniit illuanut sanguteqattaaruk

2. Alleqqut sassaruk

3. Aatsaruloorit

Tunusuup qungatsillu nukiinik tasitsaarineq

• Qitit narlortillugu ingigit – siumuinnarlu isigalutit
• Isikkatit natermut tussinnaassapput
• Tuitit qasukkartikkit, akornuteqanngitsumillu anersaartorsinnaanissat isumagiuk
• Sugiusaatit anniartitsissanngillat
• Sekundit 15-it 20-illu akornanni tasisimatitsissaatit
• Sungiusaatit immikkut pisariaqartitsineq naapertorlugu nangeqqinneqarsinnaapput

4. Tuitit appartikkit. Niaqqut eqqissillutit sangutillugu malartiguk qummullu isigalutit. Alleqqut sassaruk. Qungatsivit saatungaata sukannera malugiuk.

5. Niaqqut kigaatsumik sangutillugu malartiguk qummullu isigalutit. Assannik amminnut tigummisuliorit. Qungatsivit sinaata sukannera malugiuk.

6. Assatit itumatit avallinngorlugit makitsinnut tutsikkit imal. talitit timinnut attuutsillugit nivingatikkit. Kiasitit imminnut qanillisikkit, sivikitsumik taama sukasimagit kigaatsumillu qasukkarlutit.

7. Kullutit illuttut ataani kigutinnut tutsikkit tikitillu illuttut qulaani kigutinnut tutsillugit. Qaneq ammarlugu alleqqullu nukingi sukallugit kigaatsumik avissaartikkiartuaakkit. Sekundit pingasut tallimallu akornanni sukasimatikkit.

8. Ullormut arlaleriarlutit ajornanngippat minutsit qulikkaarlugit arlaannik ass. tyggegummimik tamuasarit.

Pullagunnaarsarneq:

• Kiinnat, qungatsit qanerpillu ilua pullappata sungiusagassat
• Qinnguartartereeruit ammillu mamippat aatsaat pullagunnaarsarneq aallartissavat
• Ullaakkut unnukkullu minutsini tallimani sungiusartassaatit

9. Assat siaarlugu uninnut inissiguk. Unit naqilaarlugu 15-neriarlutit sallaatsunik ammalortuliorit. Illuatungaani aamma taamaaliorit.

10. Assavit tunui talluppit ataanut inissikkit. Ersatit illuttut sallaatsumik qummut tagiakkit, siutivit qulaanut tunuanullu tunusuit tungaanut ingerlaqqigit. Illuttut ataatsikkoortititsiniassagavit assatit illuttut atukkit. sakkortuallaamik ammit kissatsillugu tagiartuinissat mianersuuguk. Kissanneq pullannerulersitsisinnaavoq.

Timip ipiutaasartaanik sukanganerulersitsineq

Qinnguartartinnerup ammip ikia nukiillu qinnguartarneqarsimasut sukasimalersissinnaavaat tasisuaarunnaarsillugillu. Mianersortumik iliuuseqarnikkut timip ipiutaasartaasa nikisissinnaanerat pitaanerulersinneqarsinnaavoq. Taamaalilluni taqqat sianiutillu naqisimaneqarnerat annikillissaaq aallu ingerlaarnera pitsaanerulerluni.

11. Timip ipiutaasartaanik nikisitsisinnaanissaq anguniarlugu sungiusarneq
Nallarit ingigilluunniit. Assavit aappaa qutuit ataatunginnguanut sakissannut tutsiguk. Assavit aappaa qaanut tutsiguk. Ammukartiitigalugu naqiguk. Minutsi ataaseq marlulluunniit taamaasisimagit. Niaqqut illuanut sannertiguk minutsi ataaseq marlulluunniit taamaasisimagit. Assatit qutuit illuata ataanut pisikkit sungiusaallu nangeqqiguk. Ameq panertillugu taamaaliortoqassaaq.

Sungiusaatit pitsaasut allat

1. Siggutit inngikkit. Sekundit tallimat taamaalisimagit.

2. Qarnit ammalaarlugu – sapinngisat tamaat qungujugit. Sekundit tallimat taamaalisimagit.

3. Oqqat anillatillugu sapinngisat tamaat tasiguk.

4. Eqivit saamiata/talerpiata tungaanut oqqat tinnutiguk.

5. Kigutivit/ikkivit saatungaa tunuatungaalu oqqannik tagiartukkit.

Tunusummut tuinullu sungiusaatit

• Qitit narlortillugu ingigit – siumuinnarlu isigalutit
• Isikkatit natermut tussinnaassapput. Tuitit qasukkartikkit akornuteqanngitsumillu anersaartorsinnaanissat isumagiuk
• Talitit timinnut tutsillugit nivingatikkit

Sungiusaatit kigaatsumik ingerlatikkit. Sungiusaatit immikkut tamaasa quleriartakkit -ullormut ataasiarlutit marloriarlutilluunniit

6. Tuitit kivikkit nukivillu sukannerat malugiuk. Silammut anersaajutigalutit tuitit kigaatsumik appartikkiartuaakkit. Tuivit apparnerat tunusuillu tallinera malugiuk.

7. Tuitit nagguaasigut annikitsinik ima kaaviteqattaakkit: Tuitit qullariarlugit tunummut, ammut siumullu kaavitikkit. Kaavititsinerit kigaatsumik annertusiartuaartiguk. Anersaartorluarsinnaanerit kigutivillu kiisimannginnerat maluginiaruk.

8. Tuitit appakkit. Siutit talerperleq tuivit talerperliup tungaanut uertiguk. Niaqqut kigaatsumik massiteqqiguk saamiullu tangaanut taamaalioqqillutit.

9. Tuitit appakkit. Niaqqut sapinngisat tamaat saamimmut talerpimmullu sanguteqattaaruk.

10. Tallut tunuartillugu marloqiusanngoruk. Kigaatsumik sikikkiartorit.

11. Tallut tunuartillugu marloqiusanngoruk. Taamaalisimatsiarit kigaatsumillu qasukkarlutit.