Isip qasertittarnerannut suliaritereernerup kingorna inuit ilaat qasertittooqqissinnaapput (Efterstæri). Matumani quppersakkami suunersoq atuarsinnaavat.

Suua qassillu qasertittooqqittarpat?

Isit qasertittoornerannut pilatsikkavit isippit igalaasartaa (lensia) peerneqarpoq, puuali atatiinnarneqarluni. Igalaasaq nutaaq igalaasakuvit puuanut ikineqarnikuuvoq. Qasertittooqqinneq tassaavoq isip igalaasartaata (linsep) puua qaserajuttunngornera. Tamanna isit 100-t pilatsinnikuusimagaangata isit 15-nini pisinnaavoq. Pilatsereernerup kingorna qaammatit ukiulluunniit arlallit qangaangiutereerpata takkussinnaavoq.

Qasertittooqqinnermi ersiutaasut

Qasertittooqqinneq isigiarsunnermik aammalu qaamasunik isigigaanni inngiasunnermik kinguneqartarpoq.

Qasertittooqqinnermut katsorsartinneq

Katsorsarneqarnissaa laserimik isumagineqarsineqartarpoq. Navianarsinnaasunik ilakutaqarnissaa qaqutiguungaatsiarpoq, soorlu isip iluata ameraasartaannik pullattoorneq.

Qasertittooqqinnermut misissortinneq katsorsartinnerlu

Qasertittooqqinnermut misissortissaguit isit misissorluarniarlugu kuseriartissaatit – isippit qernertortaannut (pupilianut) allisaatinik.

Katsorsartinnermi issiassaatit, katsorsartinnerlu minutsit ikittunik sivisussuseqarlunilu annernanngilaq.

Katsorsartereernerup kingorna

Laserimik katsorsartereeruit makku misigisinnaavatit:

• Katsorsartereernerup kingorna nipaallisaatit pisariaqarneq ajorput
• Isit aappillilaarsinnaavoq iluaalliulaarlunilu
• Takusinnaasavit iluanni ersernerluttut mikisut aalasut imaassinnaasoq takusinnaagitit, tassaappullu qasertittooqqinnerpit sinnikui. Taakku naviananngillat qaratsappillu isigiunnaarnissai sungiukkumaarpaa

MALUGIUK: Isivit qernertortaannut allisaatinik kuseriartikkumaaravit. Akunnernik 4-nik sivisussusilimmik sunniuteqarumaarlutik. Isigisinnaassutsit ersernerlulaassaat inngiasunnerulaarlutillu. Taamaammat siunnersuutigaarput seqinersiutit nassarnissai. Ulloq taanna biilissanngilatit.

Katsorsartereernerup kingorna misissortinnissaq

Nalinginnaasumik laserertereernerup kingorna misissorteqqittariaqanngilatit.

Ilimaginngisamik ippigisaqaruit apeqqutissaqaruilluunniit

Katsorsartereernerup kingorna ulloq siulleq ilimaginngisamik ippigisaqaruit anniaruilluunniit tutsaqarfigissavatsigut. Taassumalli kingorna nammineq isit nakorsat attaveqarfigissavat.

Inussiarnersumik inuulluaqqusilluta

Isit Nappaataannik Immikkoortortaqarfimmi sulisut, Rigshospitalet,
Grå stær team.