Uummatip eqittaqattaarnera nalinginnaasumik tillertitsisunit uninnganermi tillerit minutsimut 50-70-illu akornanniinnissaannik – ilungersornermilu tillerit minutsimut 200-it pallinnissaannik qulakkeerisunit aqunneqarpoq.
ummatip pissusissamisut tillernerani uummatip nammineq qitiusumik tillertitsisuani immikkoortumi qullermi talerperlermi tillerneq aallartittarpoq (sinusknuden), tassanngaanniillu immikkoortut qulliit nukiinut siaruaattarluni. Tamatuma kingorna tillerneq uummatip immikkoortuisa nukiinut uummatip immikkoortuisa alliit akornanni qitiusumik tillertitsisoq (AV-knude) aqqutigalugu – tillerfiit ataatsimoortut (HIS bundt) ataatsimoortunut minnernut arlalinnut avalequtitaartoriarlutik nukiit sananeqaataannut ataasiakkaanut ingerlaqqittarput.
Uummatip tillertitsisui
Uummat akulikippallaamik tillerpat
Tillertitsisut qitiusumik tillertitsisumeeratik allaminngaanneerpata, uummat pissusissarinngisamisut akulikippallaamik tillilissaaq. Uummatip akulikippallaamik tillernera immikkoortunit allerneersutut taaneqartarpoq. Uummatip akulikippallaamik tillernerani uummat aammik naammattumik timimut ingerlatitsisinnaanngimmat ilaatigut qaratsap iltilersorneqarnera annikillisarpoq. Tamatuma ilaatigut uummatip tillerulunnera, uissannguneq iluaallernerlu ersiutigisinnaavai uummatillu unittoorneranik kinguneqarsinnaalluni.
Uummatip immikkoortuinit allerniit uummatip akulikippallaamik tillilerneranut patsisaasut amerlapput. Uummatip tillernerata akornuserneqarneranut uummalluuteqarneq patsisaagajunneruvoq, ass. uummatip qaani taqqakkut nappaateqarneq, uummatip aammik ingerlaartitsilluarsinnaannginnera, kingornuttakkat inunnguuseralugilluunniit uummalluutit.
ICDmik atortorissaaruserneqarnermut patsisaasut
ICD-ip (Implantérbar Cardioverter Defibrillator) ilinnut iluaqutaasinnaanera nakorsamit naliliivigineqassaaq. Illit oqaloqatigalutit kissaatigigukkulu – qanigisatittaaq peqatigalugit aalajangiivigineqassaaq.
ICD-lersinnissamut patsisaasut pingaarnerit marluupput:
- Uummatip akuttoqatigiinngitsunik tillernera navianaatilik, allatut naammaginartumik isumannaassusilimmik nakorsarneqarsinnaanngitsoq imal.
- Uummatip navianaatilimmik akuttoqatigiinngitsumik tillilersinnaaneranut annertuumik navianaatitallimmik uummalluuteqarnermi pitsaaliuinermut atatillugu atortulersinneq
ICDp nappaat ajorunnaarsissinnaanngilaa uummatilli navianaatilimmik akuttoqatigiinngitsumik tillilissagaluarpat nakorsarsinnaavaa.
ICD qanoq sunniuttarpa?
ICD tassaavoq qarasaasiaaraq batteriilik elektrode amitsoq uummatip immikkoortuani talerperlermi allermi inissinneqarsimasoq aqqutigalugu uummativit tillerneranik nalunaarsuillunilu nakkutilliisoq. ICD aamma uummmarsaammik taaneqartarpoq.
ICD-ip uummatip akuttoqatigiinngitsumik sukkasuumik tillilersarnera inuunermut navianarsinnaasoq malinnaaviginiarlugu uummativit tillernera nakkutigiuarpaa.
Uummatip immikkoortuinit allanit aqunneqartumik uummat tillerululerpat tamanna unitsinniarlugu ICD nakorsaataasinnaavoq. Tamanna ima pisinnaavoq:
- Uummatip immikkoortuini allerni tillerneq akulikillippat ICD erngerluni uummatip tillertitsisuinik tamanik sivikitsumik ´nukillaartitsisumik´ qupinnguallatitsissaaq. Taamaalilluni uummat nalinginnaasumik tilleqqilissaaq. Qupinnguallanneq malunnartarpoq sivikitsumillu annernarajulluni.
- Uummatip immikkoortuinit allerniit uummat tilleruluppat tamanna unitsinniarlugu ICD-ip tillernernik nalimmassaasuanit tillertitsisut sukkasuut (malugineqarsinnaanngitsut) sunniutissapput. Taakkulu tassaapput uummatip tillerneranik kigaallatitsisussat Anti Takykardi Pacing (ATP). Taamaaginnarpat ICD uummammik pissusissaatut tillilersitsisumik qupinnguallatitsisinnaavoq.
Uummat akuttusuunik tillerpat ICD uummatip tillerneranik nalimmassaasutut nalinginnaasutut (pacemaker), pisariaqartitsinermi qupinnguallatitsisartutut taamaalillunilu uummatip tillernerata annikinnerpaaffisaminiinnissaanik attassisartutut sunniutissaaq. Tillertitsinerit malunnanngillat.
Tillerit pissusissamissut akuttoqatigiittillugit, ICD aallartinneqassanngilaq.
ICD atorlugu uummatip imm. allernik ataatsikkut tillilersitsineq = Cardiac Resynchronization Therapy ICD (CRT-ICD)
Uummativit aammik timimut ingerlaartitsisinnaassusaata annikillingaatsiarsimanera ilungersortilluni anernikilliungaatsiarnermik nassataqarajuppoq.
Tamatuma peqatigisaanik uummatip tillertitsisui ataatsimoortut ajornartorsiutaappata taamaalillutillu uummatip immikkoortui alliit ataatsikkooratik eqittarnerat ajornartorsiutaappat, ilaatigut anertikkarnermut annikillisitsisumik uummatip immikkoortuinut allernut (ataatsikkut) ICD-mik ikkussisoqarsinnaavoq (CRT atorlugu nakorsaaneq)
Uummativit aammik timimut ingerlaartitsilluarsinnaannginneranut nakorsaatitit ingerlatiinnassavatit.
ICD atorlugu uummatip imm. allernik ataatsikkut tillertitsineq (CRT-ICD) uummatip immikkoortuani saamerlermi alliup tunuani taqqamut ikkussamik immikkut elektrodeqarneq allaassutigaa. Uummatip akulikippallaamik tillerneranik nakorsaanerup saniatigut pacemakerertaa, uummatip tillerneri tamaasa uummatip immikkoortui alliit tillertitsisumik qupinnguallatsittarpai. Taamaalillutik ataatsikkoornerullutik eqittarput aammillu annertunerusumik timimut siammartitsisarlutik. Taanna Cardiac Resynchronization Therapy (CRT) taaguuteqarpoq.
ICD-it assigiinngitsut tamaasa pillugit paasissutissat nalinginnaasut
ICD-mik atortulersinnissaq ullut marluk pingasulluunniit uninnganermik nassataqarsinnaavoq imal. uninnani ulloq ataaseq misissorteriarlutni ulloq alla suliaritinnerusinnaalluni. Taakku arlaata sorliup ilinnut atuunnissaanut illit qanoq
innerit pingaarnertut apeqqutaassaaq. Uninnani misissortinnermi peqqissaasumiit nakorsamiillu allattugaatinut nalunaarsuisoqassaaq.
ICD-ip elektrodillu takunissaannut periarfissinneqassaatit.
Tamatuma saniatigut
- aaversissaatit
- uummatisiortissaatit (EKG)
- aappit taqqanut naqitsinera uuttorneqassaaq kissarnersiorneqassaatillu
Ilaatigut uummatip tillernera atortorissaarut angallattagaq mikisoq iluaqutsiullugu nakkutigineqassaaq (telemetri).
Sutunnginnissaq
Suliaritinnissat nal.ak. arfinilinnik sioqqullugu naggammik nerisinnaavutit, nal. ak. marluk sioqqullugu naggammik immuttaqanngitsunik imersinnaallutit (imermik, tiimik, kaffimik imal. saftimik). Allamik isumaqatigiissuteqartoqanngippat nalinginnaasumik ullaakkut iisartakkatit iissavatit. Quisaatitoruit sulisut isumaqatigiissuteqarfigeqqaarlugit aatsaat taanna iisinnaavat. Aammut imerpallassaammik Marevanimik Pradaxamilluunniit nakorsaateqaruit, suliaritinnissat ullualunnik sioqqullugu unitsikkallarnissaanik nalunaarfigineqarumaarputit.
Ullormi suliaritiffimmi
Piareersarnerit:
- Aappit taqqanut naqitsinera uuttorneqassaaq kissarnersiorneqassaatillu
- Ullaaq taanna imal. suliaritinnissat aqaguppat unnukkut uffassaatit - cremissanngilatilli
- Napparsimmaviup atisaataanik atisassinneqassaatit – makiaarummilli assigisaanilluunniit nassarnissaq luaqutaasinnaavoq.
- Suliaritereeruit nipilersuutinik tusarnaarusukkuit TV-kulluunniit aallakaatitanik isiginnaarusukkuit siutequtinik nassarsinnaavutit
- Kukitit qalipassimagukkit qalitaataat piiassavat
- Pinnersaatit nalunaaqutaaqqallu sikaavinnut parnaartartumut inississavatit
- Nipaallisaammik Panodil/Pinex/Pamol neqeroorfigineqassaatit.
Suliaritinneq init quleriit aappaanni Kardiologisk Laboratoriami ingerlanneqassaaq. Amerlanerit pisullutik pilattaavimmukartarput tassaniissappullu nakorsaq ataaseq marlulluunniit peqqissaasullu marluk pingasulluunniit. ICD-mik nioqqutissiortut aallartitaat najuutissaartaaq.
Suliaritinneq aallartsitsinnagu nal.ak. affaata missaa assigiinngitsunik piareersarfiussaaq:
Sullulimmik talinni taqqamut nakorsaasiinermut atugassamik ikkussisoqassaaq (drop). Aseruuttornerit pitsaaliniarlugit tassuuna suliaritinneq aallartilivippat antibiotikamik tunineqassaatit. Talikkut aappit taqqanut
naqitsineranik uuttuinissamut atugassamik (nerngullugu pullattagaq) inussannullu aappit ilteqassusaanut uuttuummik ikkussissoqassaaq. Tamatuma kingorna sakissavit ilaa ICD-ip ikkuffissaa tapppiorannartuiarneqassaaq annoraaminernillu tappiorannartuiakkanik qallerneqassalluni.
Suliaritinneq nal. ak. ataatsip missaanik sivisussuseqassaaq - CRT-lli ikkunnissaa sivisunerusinnaalluni.
Ikkussinerit tamangajammik qerititsinikkut ingerlanneqartarput. Suliaritinninni eqqumaannarnissat peqqissaasunillu nakorsamillu oqaloqateqarsinnaanissat tamatuma nassatarissavaa. Suliaritinnerup nalaani nipilersuutinik naalaarnissamut periarfissaqarpoq.
Suliaritinneq aallartippat tarajulersorfissakkut nipaallisaatinik neqeroorfigineqassaatit. Tamatuma kingorna qutup saamerliup ataatungaa ICD-ip ikkuffissaa qeritinneqassaaq.
Qitititsineq sukasimanertut qasilliallannertulluunniit sivikitsutut malugineqarajuppoq.
Suliaritinninni annialissaguit iluaalliulissaguilluunniit nipaallisaammik eqqissisaammilluunniit taqqakkut tuneqqissinnaaqqullutit tamatuma oqaatiginissaa pingaaruteqarpoq.
Nakorsap qinnguartaalluni assiliissut atorlugu elektrodit taqqakkut uummammut ingerlatissavai. Elektrodit eqqortumik inissinneqarsimanerat ilaatigut elektrodip kalerrisaarutaasa uuttortarnerisigut paasiniarneqartarpoq. Pitsaanerpaamik inissippat elektrodit ICD-mut tamatuma kingorna ammip ikianut ”kaasarfimmik” taasamut inissinneqartussamut atassuserneqassapput. Tamatuma kingorna ameq mersorneqassaaq.
Ilaatigut suliaritinnerup naammassineqalernerani ICD-ip qupinnguallatitsisinnaassusaa misilinneqartarpoq. Tamanna sivikitsumik sinitsitaanikkut uummatip akulikitsunik tillertinneqarneragut ICD-ip qupinnguallatitsisinnaassusaata pitsaanerpaaffissaminiinneranik naliliinikkut ingerlanneqartarpoq. Taama misiliinissaq tamatigut pisariaqartanngilaq.
Qaqutigut misiliinerup ICD- ip pisarnertut uummatip akulikippallaamik tillerneranik pissusissamisut tillilersitsilluni qupinnguallatitsisinnaannginnera takutippagu, sakissat qaasigut qupinnguallatitsinikkut uummat nalinginnaasumik tillerteqqilersarparput. Tamatuma kingorna ICD-ip qupinnguallatitsissutaata nalimmassarneragut, ICD-ip elektrodiata nuunneragut imal. qaqutigooqisumik sakissat saamiata tungaani ammip ikiagut immikkut elektrodiliinikkut ajornartorsiut aaqqiivigineqartarpoq.
Suliaritereernermi
Suliaritinnerup kinguninngua siniffinnut utissaatit. Peqqissasup mattutit alakkassavaa aappillu taqqanut naqitsinera uuttorlugu. Tamatuma kingorna nerisinnaavutit imersinnaallutillu, taamaaliornissamullu inuummarissutut misigisimaleruit siniffinniit aqqarsinnaanngussaatit.
Ulloq taanna kingusinnerusukkut uummatit puatillu qinnguartarlugit assilineqassapput.
Ikivit eqqaa anniarilissagaluarukku nipaallisaammik pisinnaavutit.
Suliaritereernerup kingorna ualikkut imal. aqaguani ullaap tungaa angerlarnissannut misissuisoqassaaq. Tamatumani atortorissaarut teknikerinit immikkut ilinniagalinnit misissorneqarlunilu nalimmassaqqissaarneqassaaq.
ICD illit pisariaqartitannut naapertuussarlugu inissinneqassaaq. Tamanna ICD-mut attaveqarsinnaajumalluta taamaalillutalu nakkutigisinnaanngorlugu paasissutissartaanut atortorissaarutit saviullu kajungerisaa immikkut ittoq (inissiiniarnermi atortoq), ICD-ip ”kaasarfiata” qulaanut inissinneqartut atorlugit ingerlanneqassaaq.
Angerlalernermi misissortinnermut atatillugu ICD siunissamilu tamatuminnga atortorqarlutit inooriaasissat pillugit paasissutissinneqassaatit.
Angerlalerninni misissortinnissaannut ajornanngippat qanigisannik ilaqarnissat innersuussutigaarput. Arliulluni paasissutissanik tusarnaarneq annertuumik iluaqutaasarpoq.
ICD naammaginartumik ingerlappat kingunerluutitaqanngippallu ualeq taanna unnukkulluunniit angerlarsinnaassaatit. ICD-mik CRT-talimmik ikkussivigineqarsimaguit, aqaguani aatsaat angerlartinneqassaatit. Sivisunerusumik uninnganissat pisariaqassappat ass. nakorsaatitit allanngortinneqassappata najukkanni napparsimmavimmut nuunneqassaatit. Suliaritinnerpit kingorna nal. ak. 24-it qaangiutsinnagit qorlortitsivigalutit uffassanngilatit. Mattutit suliaritereernerpit kingorna ullut marluk qaangiuppata piivissinnaavat. Ikit mamivitsinnagu nalinginnaasumik sap.ak. sisamat uffarfimmut ikillutit uffassanngikkallarputit/naluttarfimmi nalussanngikkallarputit.
Kilutit isumaminnik aattussaapput. Kilut isui ullut qulit missaasa qaangiunneranni katassimanngippata mianersorlutit nammineq qiorlugit kipisinnaavatit.
Ikit anniarilissagukku talivilluunniit atornera anniarissagukku, nipaallisaatitorsinnaavutit, ass. Panodil, Pinex imal. Pamol – iisartakkat marluk ullormut marloriarlugit sisamariarlugilluunniit. Suliaritereernerup kingorna ullut siulliit nipaallisaatit atorfissaqartinneqarajupput.
Kingunerluutit
ICD-mik ikkussivigineqarneq ullumikkut nalinginnaasuuvoq, isumanaaqalunilu. Danmarkimi ukiumut ICD-it 1000-it ikkunneqartarput.
Suliaritinnerni tamani kingunerluuteqarsinnaaneq annikippoq, sulisullu tamakkununnga iliuuseqarfiginninnissamut immikkut ilinniarsimapput. Sundhedstsyrelsimit inatsit naapertorlugu kingunerluutaasinnaasunik ilisimatinneqassaatit.
Elektrodit ikkunneqarneranni silaannarmik aammilluunniit annikitsumik katersuuttoqarsinnaavoq.
Taamaattoq ullualuit qaangiunneranni isumaminik peerukkajuppoq, taamaanngippat sullulimmik ulluni marlussunni atasussamik imaarsaasiisoqarsinnaavoq. Suliaritittut 100-uugaangata marluk taama nalaataqarsinnaasarput.
Sullulik uummat pitarlugu appakaassinnaavoq taamaalillunilu uummatip ameraasaanik aammik immatitsisinnaalluni. Suliaritittut 500-uugaangata ataaseq taama nalaataqarsinnaasarpoq.
Uummatip amersaasaani aanaarneq kapuummik imaarneqarajunneruvoq; tamanna ajornassappat qaqutigorluinnaq pisartumik pinasuartumik pilatsittoqartariaqarsinnaassaaq (suliaritittut 1000-iuppata ataatsimit ikinnerusunit nalaanneqarsinnaasartoq).
Qaqutigut elektrodit arlaat uummammi illikarsinnaavoq. Tamanna elektrodip pissusissamisuunnginneranik kinguneqarsinnaammat suliariteqqinnikkut allamut inissinneqassaaq. Elektrode taarsetariaqalerluni ajoquserneqarsinnaavoq. Suliaritittut 100-uuppata pingasut missaat taama nalaataqarsinnaapput.
Suliaritereernerup kingorna ikikkut aammik katersuuttoqarsinnaavoq. Tamanna pullalernermik ippinnarsinermillu isumaminik qaangiuttussamik ersiuteqarsinnaavoq. Qaqutigooqisumik aak annikitsumik suliaritinnikkut imaartariaqassaaq. Suliaritittut 500-uuppata ataatsip missaa taama nalaataqarsinnaavoq.
Aseruuttoorsinnaanermut pitsaliuisoqaraluaq qaqutigut aseruuttoortoqarsinnaasarpoq (suliaritittut 500-uuppata marluk taama nalaataqarsinnaapput).
Uummatip immikkoortuinut allernut illugiinnut ICDmik ikkussisoqarnerani ilaanni elektrodi uummatip immikkoortuata alliup saamerliup tunuani taqqamut ikkussassaq ikkukkuminaassinnaasarmat taama suliaritinneq sivisunerulaarsinnaasarpoq. Suliaritinnerit 100-uuppata sisamani elektrodimik tamatuminnga ikkussinissaq taamaatiinnartariaqartarpoq.
Taamatuttaaq uummatip immikkoortuinut allernut illugiinnut ICDmik ikkusinermi uummatip immikkoortuata alliup saamerliup tunuani taqaq elektrodilerniagaq ajoquserneqarsinnaavoq. Tamanna qaqutigorsuaq ajornartorsiutaasinnaavoq. Suliaritittut 100-uuppata taama nalaataqarsinnaasartut ataatsip inorpai.
ICD –ip uummatip tillernera ”paatsoorsinnaavaa” inuunermullu navianaatilimmik uummat tillerulunngikkaluaq
qupinnguallatitsisinnaalluni. Tamanna ICD-p inissinneqarneranik allannguinikkut aaqqiivigineqarsinnaagajuppoq. Kingunerluut taanna ukiumut 5%-it missaanni takuneqartarpoq.
Elektrodiliineq pissutaalluni taqqat atorneqartut milinneqarsinnaapput. Taamaattoqarnera talip immaqalu qungatsip pullalerneranik ippinnarsineranillu kinguneqarsinnaavoq. Kingunerluut taanna qaqutigoortuuvoq aammullu imerpallassaammik nakorsaateqarallarnikkut iluaquserneqarsinnaagajulluni.
ICDqarluni inuuneq
Angerlareernerpit kinguninngua ulluinnarni inuunerisimasannut uteqqissinnaavutit. Taamaalillutillu sulileqqissinnaavutit, angalasinnaavutit sunngiffinnilu sammisartakkatit atoqateqartarnerlu nangeqqissinnaallugit.
Uninngareernerup kingorna misigissutsikkut qisuariaateqarneq qanigisaasunissaaq nalinginnaavoq. Ilaat annilaangasutut imal. toqqissisimanngitsutut misigisarput – allat qiimassutsip nikerarnera misigisarpaat. Taama misiginermi allanik – ilaquttanik, ikinngutinik – misigisat pillugit oqaloqateqarneq iluaqutaalluartarpoq. Ilaannut psykologimik oqaloqateqarneq ikorfartuutaasinnaasarpoq. Tamanna nakorsavit innersuussineragut aaqqissuunneqarsinnaavoq.
ICDmut kaasarfik
ICD cm-ip ataatsip missaanik issussuseqarpoq 70-80 gramminillu oqimaassuseqarluni. Amerlanerni qutup ataatungaani inissisimaffia tinunertut annikitsutut isikkoqarsinnaavoq. Taassuma takussaanera nakorsarneqartut ilaannut pingaaruteqarpoq. Ikkunneqarnerata kingorna ullut siulliit nalaata pullalluni, ippinnarluni aappalulaarnera nalinginnaasuuvoq.
Ullut tamaasa ikit ICD-llu eqqaa takusariaqarpat.
Ikit aappillissappat, kissatsissappat, pullalissappat (ass. aammik katersuuttoqarpat), seerilissappat ippinnarsissappalluunniit (aseruuttuulernermut immaqa ersiutaasunik), imal. ajunnginnersoq nalornissutigigukku, uunga sianissaatit:
Pacemakerillit nakorsiartarfiat oqarasuaat: 35 45 48 25
Timimik atuineq
Ikkussivigineqareernerup kingorna qaammat siulleq ICD-mik ikkusiviup nalaani talinnik/tuinnik 4 kiilut sinnerlugit kivitsinaveersaarnissat innersuussutaavoq.
Talit atorsinnaavat tasitsaarnissalli ingalassimassavat. Ass.: tennis - golf – naatsiivinni nivaatarsorneq – apummik nivanneq – eqaarsaarfimmi talinnik nivinganeq. Tamanna elektrodip akornuteqanngitsumik ”inissilluarsinnaanissaanut” innersuusutaavoq
Killilersuutit taakku saniatigut angerlarnerpit kingorna ullualunnguit qaangiunneranni anniarunnaaruit tamatumunngalu inuummarissutut misigisimaleruit nalinginnaasumik sammisartakkatit aallarteqqissinnaavatit.
Timersorsinnaavutit taamaakkaluaq unammilluni timersorneq innersuussutaangilaq (ass. tilluunneq) timersoqatillu attortarlugit timersornerit allat ICD-ip nalaanik annertuumik annersitsisinnaasut innersuussutaanngillattaq.
Iltilersuuserluni immamut aqqarnissaq innersuussutaanngilartaaq
ICD-ppit nakkutigalugu misisortarnissaa
Nakorsaatitornerit uummalluutinnillu misissortittarnissaq nalinginnaaasumik najukkanni napparsimmavimmi ingerlanneqassaaq pingaarnertut ICD-vit Rigshospitalip Pacemakerilinnut nakorsiartarfia aqqutigalugu misissorneqartarluni ilaannilu nalimmassaqqissaarneqartarluni malittarineqassaaq.
Tamanna pacemakerilinnut nakorsiartarfimmi angerlarsimmafimmiillu tamatumunnga atortorissaarut- ilitsersuutitaa ilanngullugu tunniunneqartoq- atorlugu misissuinikkut pisarpoq.
Pacemakerilinnut nakorsiartarfimmi misissortinneq siulleq suliaritereernerup kingorna qaammatip ataatsip marlulluunniit qaangiunneranni pissaaq. Tamatuma qaqugu pinissaa angerlalernermut atatillugu misissortinnermi isumaqatigiissutaassaaq. Misissortinnissat allat amerlanersaat avataaniit misissuinertut ingerlanneqartussat pillugit
qaammatit arfinillit qaangiunneranni nakorsiarnissaq isumaqatigiissutigigajupparputtaaq. Avataaniit misissuinerup ICD-ip avataaniit nalimmassartariaqarnera takutippagu - ICD-it pillugu imal. uummativit tillernera akornuteqarpat pacemakerilinnut nakorsiartarfiliarnissat pisariaqartikkukku – tamanna oqarasuaatikkut isumaqatigiissutaassaaq.
Misissuinermi siunertaasoq tassaavoq
- ICD-p nakkutiginissaa
- uummatip tillernera akornuteqarpat naliliivi ginissaa
- elektrodit naliliiviginissaat - batteriip attartussusaanik naliliineq (ukiut arfinillit arfineq pingasullu akornanni ata- sinnaanera naatsorsuutigineqarpoq).
Ukiut arlertut qaangiunneranni batterii imaarutingajalersutut nalilerneqarpat, ICD-taarserneqartussanngussaaq, elektrodilli nalinginnaasumik atoqqinneqartarlutik. Naliliinerup nalaani qaammatit pingasut missaanni suli atasinnaagallassaaq.
Nakkutilliinerit saniatigut ICD-it amerlanersaanni nipiliortumik sajukulaartumilluunniit misissortariaqangajalernermik kalerrisaarisumik immikkut isumannaallisaateqarpoq. Tamanna batteriip imartussusaanut imal. elektrodit qanoq innerannut tunngatillugu ajornartorsiuteqarnermik patsiseqarsinnaavoq. Angerlalernermut atatillugu misissortinninni kalerrisaarutit taakku ICD-nni qanoq inissinneqarsimanerat qanorlu qisuariarfiginissaat pillugit nassuiaanneqassaatit.
ICD-atorlugu nakorsarneqarnermik allannguineq
Inuunerpit ingerlanerani uummalluutit nakorsaatillu atorlugit nakorsartinnerit allannguuteqarsinnaasassaaq, nappaatillu allat aamma takkussinnaasassallutik. ICD-it qanoq inninnut naleqqussarlugu nalimmassarneqartuassaaq.
ICD-ip atorunnaarnissaa- ass. nakorsarneqarsinnaanngitsumik nappaateqalernermi uummatip tillernerata akornuteqarnerata qupinnguallatitsinikkut nakorsarneqarnissaata kissaataajunnaarnerani-
eqqartorneqalersinnaajumaarpoq. Taama pisoqartillugu illit (qanigisavillu) nakorsarlu saniatigut nakorsartinninnut akisussaasoq oqaloqatigiinnissigut ICD-ppit qupinnguallatitsisinnaajunnaarlugu inissinneqarnerata allanngortinneqarnissaa naliliivigineqassaaq. Tamatumunnga tunngatillugu illit kissaatitit tamatigut ataqqineqassapput.
ICD-korti
Angerlalerninni misissortinninni ICD-kortimik nunarsuaq tamakkerlugu atorneqartumik ICDqarninnik taassumalu qanoq ittuuneranik paasissutissiissumik tunineqassaatit. Korti taanna tamatigut nassatarisariaqarpat, misissortinnissat nakorsartinnissallu sioqqullugit nakorsamut, kigutilerisumut timimillu sungiusaasumut takutittarlugu.
ICD-mit qupinnguallatsinneqaruit
ICD-miit ataasiarlutit marloriarlutilluunniit qupinnguallatsinneqaruit tamatumalu saniatigut ajunngitsutut misigiguit, pacemakerilinnut nakorsiartarfik ulluinnarmi tulliuttumi oqarasuaatikkut:
35 45 48 25 attavigissavat.
Tamatumani saniatigut nalimmassaqqissaartariaanersoq naliliivigisinnaajumallugu ICD-iip misissornissaa isumaqatigiissutaagajuppoq.
Tulleriinnik qupinnguallatsinneqassaguit imal. ataasiarlutit qupinnguallatinneqarninni ajortissaguit ambulancimut sianissaatit. Napparsimmavimmut ingerlanneqassaatit pisariaqarpallu tassanngaannit Rigshospitalimi uummatip nakorsaanut attaveqartoqarsinnaassaaq.
Napparsimmavimmut ingerlanneqartinnak avataaniit misissuinermi atortut aqqutigalugu
nassiussisinnaassaguit, pacemakerilinnut nakorsiartarfik ammarniariarpat misissorsinnaassavarput inerneranillu napparsimmavik nalunaarfigalugu. Tamatumunnga taarsiullugu avataaniit misissuinermi atortoq napparsimmavimmut nassarsinnaavat.
Qupinnguallatsitaaninni inummut allamut arlalinnulluunniit attuumaguit, taanna /taakku qupinnguallassanngillat, illilli nukitit qisuariassammata soorunami malugissavaat.
Ataasiakkaat ICD-minniit qupinguallatsinneqarsimanertik nalornissutigisarpaat. Taamaattoqassappat pacemakerilinnut nakorsiartarfik attavigeqqullugu - ajornanngippallu paasiniarlugu avataaniit misissuisarfimmiit nassitsinissannut - kajumissaassavatsigit. Sulisut misissuinermi nakorsaasoqarsimanersoq takusinnaavaat.
Misissuisoqareerpat erngerlutit akissuteqarfigineqassaatit
Biilernermut allagartaq ICD-lu
Angerlartinnak biilernermut allagartavit pigiinnarsinnaanissaanut immikkut malittarisassaqarnersoq nakorsap ilisimatitsissutigissavaa. Nalinginnaasumik biilernermut motorcykelernermulluunniit allagartavit pigiinnarsinnaanissaanut killiliisinnaasut ICD-qarninnut toqqaannartumik attuumassuteqanngillat- uummalluutilli tamatumani apeqqutaalluni. Pingaartumik uummatip tillernera navianaatilinnik ersiutilimmik akornuteqarpat piffissami aalajangersimasumi killiliisuusinnaavoq.
Inuussutissarsiutigaluguli biilertuunermi ICDmik atortulersinneq killiliisuusinnaavoq.
ICD-linnik ataatsimiisitsisarneq
Rigshospitali qaammatit allortarlugit ICD-linnik qanigisaasunillu ualikkut ataatsimiisitsisarpoq. Ullut ataatsimiiffiusussat immikkoortortami imal. pacemakerilinnut nakorsiartarfimmi tunniunneqartarput.
Uummatimikkut nappaatillitt peqatigiiffianni ilaasortaaguit peqatigiiffimmut ’Defibrillator-
klubben’ ICD-linnut qanigisaasunullu immikkut ataatsimiinnernik ataatsimuualaarnernillu aaqqissuussisartumut akeqanngitsumik ilaasortanngorsinnaavutit.
ICD-llit ataatsimiittarnerat/eqimattat uummatimikkut nappaatillit peqatigiiffiata najukkani sullissiviini ilaanni aamma aaqqissuunneqartarput.
Pissutsit immikkut ittut maluginiartariaqakkatit
ICD-ip elektronikkiata kalerrisaarutit allatut paasisinnaammagit ammip qaagut sianiutinik sunniilluni nipaallisaaneq (TNS) kortbølgilu atorlugu - ass. timimik sungiusaanermi nakorsaaneq ingalassimaneqassapput.
Tillinniartoqarnerani kalerrisaarutit – ass. pisianiarfinniit aniffissani inissitat – sivisujaamik uninnganngikkuit sanioqqunnissaat isumannaatsuuvoq. Uninngassaguit taakku meteri ataaseq ungasillinissaat innersuussutaavoq.
Oqarasuaatit angallattakkat - oqarasuaammik angallattakkamik atuininermi ICD-qarfippit illuatungaani siutit atortariaqarpat, taamatuttaaq oqarasuaat ICD-qarfippit qulaani kaasarfimmiitissanngilat.
Tamanna oqarasuaatinik attavilinnik atuinermi atuutinngilaq.
Saviup kajungerisaqarfii sakkortuut - soorlu MR scanner atorlugu misissortinnerit – pinaveersaarneqassapput.
Timmisartoqarfiit – Timmisartoqarfiit sakkunut misissuutaasa ICD-malugigajummassuk ICD- kortit takutittariaqarpat. Isumannaallisaanermik suliallit misissuummik avaqqusseqqusisinnaapput. ICD-lli misissuutikkoornerit ajoqutiginavianngilaa.
Svejserineq – innaallagissamoortumik svejserinaveersaartariaqarputit.
Quppersakkami matumani akissuteqarfigineqanngitsunik allanik apeqqutissaqaruit attavigaluta apeqquteqarnissannut soorunami tikilluaqqusaavutit.
Pacemakerilinnut nakorsiartarfimmut sianersinnaavutit:
Oqarasuaat: 35 45 48 25